Кеген аудандық спорттық-сауықтыру кешенінде дзюдо күресінен 2010-2011 жылдары туған кіші жасөспірім ұлдар арасында қазақтың атақты биі – Тама бабаны еске алуға арналған республикалық турнир өтті.
Жарыстың ашылу салтанатында Кеген ауданының әкімі Нұрбақыт Теңізбаев, аудандық ақсақалдар алқасының төрағасы Сабыр Досымбеков, аудандық балалар мен жасөспірімдер спорт мектебінің директоры Бауыржан Тәліп, «Тама баба» қоғамдық қорының директоры Манат Исенбаев қатысушыларды құттықтап, сәттілік тіледі. Тама баба ұрпақтары атынан Ілехан Тастанов ақсақал ақ батасын берді.
Аталған турнир осымен бесінші мәрте ұйымдастырылып отыр. Ашық біріншілікке Қызылорда, Абай, Жамбыл, Алматы, Жетісу облыстарынан, Алматы мен Қонаев қаласынан және Жамбыл, Қарасай, Іле, Талғар, Еңбекшіқазақ, Ұйғыр, Кеген, Райымбек аудандарынан келген 200 спортшы 11 салмақ дәрежесінде бақ сынады.
Жарыс қорытындысы бойынша, жалпыкомандалық есепте І орынды Қаркен Ахметов атындағы олимпиада резервінің республикалық мамандандырылған мектеп-интернат колледжі иеленіп, жеңімпаз атанды. Республикалық спорт колледжі ІІ орын, Алматы қаласындағы спорттағы дарынды балаларға арналған республикалық мектеп-интернаты ІІІ орын алды. Жеңімпаздарға арнайы кубок пен медальдар табысталып, Грамота мен қаржылай сыйлық берілді.
Шара соңында «Тама баба» қоғамдық қорының директоры Манат Исенбаев баба мұрасын ұрпақтан-ұрпаққа жеткізу жолында рухани қолдау көрсеткені үшін жанашыр азаматтарды «Ел ардақтысы» медалімен марапаттады.
Дәурен ӘБУТӘЛІПОВ
Кеген ауданы
