Алматы облысының тілдерді дамыту жөніндегі басқармасы және Ұйғыр ауданының әкімдігі ұйымдастыруымен аудан тұрғындары арасында тілдерді қолдану мен дамытуға деген қызығушылықты арттыру, көптілділік мәдениетін насихаттау және түрлі этникалық топтардың тілдері мен мәдениеттерін құрметтеу мақсатында аудандық Тіл фестивалінде бірнеше маңызды номинациялар бойынша үздіктер марапатталды. Фестиваль қатысушылары өздерінің тілге деген құрметін, шығармашылық қабілеттерін және қоғамға қосқан үлестерін көрсетті.
«Үздік бейнеролик – 2025» номинациясы бойынша Алпаров Рысбек Қайратұлы марапатталды. Ол аудан әкімінің баспасөз хатшысы ретінде өз жұмысында тілдердің дамуына және мемлекеттік тілдің насихатталуына айрықша еңбек сіңірді. Оның бейне роликтері ауданның мәдени өмірін және тіл саясатын тиімді түрде таныстырып, жұртшылықтың назарын аударды.
«Тіл майталманы – 2025» номинациясын Керімқұлов Жәнет Сәдіұлы жеңіп алды. Аудандық «Ұрпақ парызы» қоғамдық бірлестігінің төрағасы, зейнеткер ұстаз Жәнет Сәдіұлы өзінің көп жылғы еңбегімен жастарға тіл мен мәдениетті сақтау жолында үлгі көрсетті. Оның педагогикалық қызметі және қоғамдық іс-әрекеті тіл мен ұлттың бірлігін сақтауға бағытталған.
«Тілге жанашыр кәсіпкер – 2025» номинациясында Жаңабай Салтанат Берікжанқызы жеңімпаз атанды. «Laffa» кафесінің басқарушысы ретінде ол өзінің кәсіби іс-әрекетінде ауданның мәдениеті мен тілдерін дәріптеуді басты назарда ұстап келеді. Ол тек бизнесте ғана емес, тіл саясатын қолдауда да белсенді жұмыс жүргізуде.
«Тіл шебері – 2025» номинациясын Анар Дүйсенбайқызы жеңіп алды. Аудандық «Қарадала тынысы-Қарадала нәпәси» газетінің бас редакторы ретінде Анар Дүйсенбайқызы өз жұмысына шығармашылық көзқараспен қарап, ауданның тілдік және мәдени мәселелеріне зор үлес қосуда. Оның басшылығымен газет өз оқырмандарына маңызды ақпараттарды, мәдениет және тіл мәселелері бойынша тың мәліметтер ұсынады.
Тіл фестивалі ауданның түрлі салаларында белсенді жұмыс жасап жүрген азаматтарды қолдап, тіл мен мәдениеттің дамуына қосқан үлестерін атап өту мақсатында өткізілді. Бұл шара алдағы уақытта Алматы облысының басқа да аудандарында жалғасын табатын болады.
Ақжарқын Бейбітқызы
Алматы облысының «Тіл» оқу-әдістемелік орталығының
Тілдерді оқыту, талдау, мониторинг бөлім басшысы
