Қарасай ауданындағы «Үшқоңыр» спорт кешенінде «Алатау арланы» атты облыстық турнир өз мәресіне жетті. Бұл жарыс қазақ күресінен өтетін «Қазақстан барысы» республикалық турниріне Алматы облысынан қатысатын үздік балуандарды іріктеу мақсатында ұйымдастырылды.
Жарыстың ашылу салтанаты отандық эстрада жұлдыздарының әсем әндерімен басталды. Ұйымдастырушылар мен құрметті қонақтар облыстық біріншілікке қатысушы балуандарға сәттілік пен жарқын жеңістер тіледі.
— Қазақ күресі бүгінде отандық спорттың нағыз брендіне айналды. Жыл өткен сайын ұлттық күреспен айналысатын қазақстандықтардың саны артып келеді. Біздің облыстың өзінде 2000-нан астам адам әртүрлі жас санатында шұғылданып жүр. Сонымен қатар «Қазақстан барысы» турнирінің де беделі мен танымалдығы жыл сайын артуда. Бұл – қазақ күресінің әлемдік деңгейге көтеріліп, ұлттық рух пен салт-дәстүрімізге деген сүйіспеншілікті арттырып келе жатқанының жарқын дәлелі. Бозкілем шеберлері бас қосатын бұл дода жас спортшыларды шыңдайды, – деді облыстық дене шынықтыру және спорт басқармасы басшысының міндетін атқарушы Рахман Шахарбек.
Жеребе тартудан кейін балуандар сайысқа түсті. Олар 90 келіден жоғары салмақта белдесті.
— Бүгінгі жарысқа тәжірибелі балуандармен бірге барлық өңірде өткен іріктеу кезеңінде үздік нәтиже көрсеткен спортшылар да қатысуда. Барлығы 32 спортшы бақ сынауда. Олардың ішінде 9 спорт шебері, 1 халықаралық дәрежедегі спорт шебері бар. Екі үздік балуан «Қазақстан барысы» республикалық турниріне жолдама алады. Биылғы жылы жас әрі болашағынан үміт күттіретін спортшыларымыз көп. Жеңімпаз «Алтын белбеуге» және 2 000 000 теңгеге ие болады. Екінші орын – 1 000 000 теңге, ал үшінші орын иегері – 500 000 теңге алады, – деді жарыстың бас төрешісі Қапар Рауанов.
«Алатау арланы» турниріндегі тартысты белдесулер бірнеше сағатқа созылды. Жеңілген балуандар жарыс жолынан шығып отырды. 32 балуанның арасынан тек төртеуі ғана финалдық кезеңге өтті. Дәл осы төрт мықты арасында жүлделі орындар үшін шынайы күрес басталып, боз кілемде нағыз спорттық драма өрбіді.
«Жүзден жүйрік, мыңнан тұлпар» дегендей, үшінші орын үшін болған белдесуде Еңбекшіқазақ ауданынан келген Нұрғали Жолтаев жеңіске жетті.
Турнирдің ең әсерлі қатысушысы – Іле ауданынан келген Жігер Сәкенұлы десек қателесе қоймаспыз. Ол осыған дейін өткен турнирдің екі дүркін чемпионы, қазақ күресінен халықаралық дәрежедегі спорт шебері, дзюдо және самбодан спорт шебері Мәди Еділбаевты жеңіп, финалға жолдама алды. Финалда оны Балқаш ауданынан келген Әлімжан Жұмахметов күтіп тұрды. Дегенмен Жігердің жоғары деңгейдегі техникалық және тактикалық дайындығы, ең бастысы – қайсар мінезі, оған «Алатау арланы – 2025» атағын жеңіп алуға және «Қазақстан барысы» турниріне басты үміткер атануға мүмкіндік берді.
— Жекпе-жек өнерімен мектеп кезінен айналыса бастадым. Қазір спортсыз өмірімді елестете алмаймын. Ол менің қызметіме де көмектеседі. Қазір жасым 34-те. Жиырма жылдан астам жаттығу нәтижесінде белгілі бір жетістіктерге жеттім. Қазақ күресі, самбо, дзюдо бойынша спорт шеберімін. ҚР ІІМ чемпионаттарының бірнеше дүркін жеңімпазымын, самбодан Азия чемпионымын. Республикалық деңгейде дзюдо мен қазақ күресі бойынша да көптеген жетістіктерім бар. Бұл турнирді ерекше бағалаймын. Былтыр іріктеу кезеңінен өте алмаған едім. Бірақ биыл облыстық полиция департаментінің басшылығы маған дайындыққа арнайы уақыт бөлді.
Қарсыластардың шеберлігі жылдан жылға артып келеді. Сондықтан жарысқа тыңғылықты дайындалдым. Барлық негізгі әдістерімді жетілдіріп шықтым. Енді «Қазақстан Барысы» республикалық турниріне тыңғылықты дайындаламын, – деді Жігер Сәкенұлы.
Облыстық турнирдің жеңімпазы «Алатау Арланы» құрметті атағына ғана емес, «Алтын белбеу» иегері атанып, қомақты ақшалай сыйақымен марапатталды. Күміс және қола жүлде иегерлеріне де лайықты сыйақылар табыс етілді.
Қуат Қайранбаев
Қарасай ауданы
