Кеген ауданы Тасашы орта мектебі жанындағы интернат қызметкерлері «Талаптың мініп тұлпарын, білімге ұмтыл, ұрпағым!» тақырыбында зейнеткер тәрбиешілермен кездесу өткізді. Іс-шараға мектеп директоры Нұргүл Абықанова, сазгер Жақсылық Әбдіраманов, ақын Шеризат Мекебаев, ұстаздар қауымы, интернат тәрбиеленушілері мен түлектері қатысты.
Алдымен қонақтарға балалар шығармашылығы көрмесі ұсынылды. Интернат меңгерушісі Құралай Оқасова білім ордасында бүгінде 60 бала тәрбиеленіп жатқанын, олардың қатарында жартылай жетім, көпбалалы және тұрмысы төмен отбасылардың балалары бар екендігін айтты. Мұнан соң іс-шара мектептің акт залында жалғасты.
«Үлкендер жолы – ұлылық, ұрпағы жүрер ұғынып» демекші, кездесуде өз заманында интернатта тәрбиеші қызметін атқарған ұстаздар – Сара Қасымханова, Ғалия Құттықожаева, Союзхан Байсабаева, Мәдина Тұрғынбаева, Жанболат Бәйімбетов, Майгүл Худжакова, Эльмира Рақымбаева және интернат түлектері Орынбасар Иемберді мен Алма Айсаевалар сөз алып, бала тәрбиесіне қатысты ойларын ортаға салды. Жиналған көпшілік интернат тәрбиеленушісі, жас ақын Бахарбек Дәулетжанның жырларымен сусындады. Оның «Алғашқы махаббат» атты өлеңіне композитор Жақсылық Әбдіраманов ән шығарған. Кеште сол туындының тұсауы кесілді. Ақын Шеризат Мекебаев шәкірті Дәулетжанға деген ықыласын «Күз айының бір күні» атты өлеңімен өрнектеді.
Қазақ халқы қай уақытта болмасын, ұрпақ тәрбиесін ұлт болашағы деп білген. Жазушы Әзілхан Нұршайықов: «Бала тәрбиесінің ең үлкені – оны еңбекке баулу, еңбекшіл жас қана ең үздік азамат болып қалыптасады», – деген екен. Баланы отбасынан және мектеп қабырғасынан тәрбиелеп, бойына ұлттық құндылықты сіңіре білсек, егемен елдің ертеңі жарқын болмақ.
Дәурен ӘБУТӘЛІПОВ
Кеген ауданы
