Қазақстан халқының бірлігі күні мен Қазақстан халқы Ассамблеясының 30 жылдығына орай Қонаев қаласында «Бірлік жүгірісі» атты спорт шарасы өтті. Аталған акция еліміздің әр аймағында бір уақытта басталып, 10 мың адам қатысты.
«Спорттағы жетістіктерімен аймақтың ғана емес, бүкіл еліміздің мақтанышына айналған жерлестеріміз аз емес. Бүгінгі таңда спортты серік етіп, салауатты өмір салтын ұстанатын азаматтар көбейіп келеді. Өйткені спорт – денсаулық кепілі. Күш-қуатыңды арттырып, бойыңды сергітеді. «Бірлік жүгірісі» шарасы біріншіден, қоғамда татулық пен ынтымақты, өзара түсіністік пен келісімді нығайтуға бағытталса, екіншіден, өңірде жеңіл атлетиканың дамуына айтарлықтай үлес қосатыны анық, – деді Алматы облысы әкімінің орынбасары Болат Күреңбеков.
Қатысушылар жарыс алдында дене қыздыратын жаттығулар жасады. Оларға грек-рим күресінен әлем чемпионатының жүлдегерлері Қорлан Жақанша мен Ербол Қоңыратов нұсқаушы болды.
Бердібек Соқпақбаев атындағы орталық саябақта жүгіруден өткен жарысқа мемлекеттік қызметкерлер, білім және спорт мекемелерінің өкілдері, Қонаев қаласының тұрғындары мен қонақтары, барлығы 250 адам қатысты. Олар үш топқа бөлінді. Қыздар мен әйелдер 2 км, жасөспірімдер 4 км, 18 жастан асқан ер адамдар 6 км қашықтыққа жүгірді.
«Бұқаралық спорттың тәрбиелік мәні зор. Мұнда қатысушылар тек өз күшін сынауға ғана келмейді, адамдардың бір-біріне деген сыйластығы мен құрметінің артыуна жол ашады, – дейді қыздар мен әйелдер арасындағы жарыс жеңімпазы, биатлоннан халықаралық спорт шебері Надежда Пивоварова. Жасөспірімдер арасында топ жарған Қонаев қаласының тұрғыны Болат Санжар да бұл спорт шарасының ынтымақ пен бірлікті нығайтуға зор үлес қосатынын атап өтті. Ал ерлер арасында мәре сызығын талғарлық Кирилл Маликов бірінші болып кесті.
«Жеңіл атлетикамен айналысқаныма жеті жылдан асты. Осы уақыт аралығында ел ішіндегі және халықаралық жарыстарда жүлдегер атандым. Жүгіруден өтетін спорт шараларынан қалмауға тырысамын. Спортпен шынықсақ, денсаулығымыз мықты болады», – дейді жеңіл атлетикадан ҚР спорт шеберлігіне үміткер Кирилл Маликов.
Жарыс соңында жеңімпаздар мен жүлдегерлер медаль, грамота және бағалы сыйлықтармен марапатталды.
