Алматы қаласындағы орталық спорт клубында қоян-қолтық ұрыстан халықаралық турнир өтті. Сайысты ҰҚК Шекара қызметі Алматы облысы бойынша департаменті мен «Застава тарландары» республикалық қоғамдық бірлестігі ұйымдастырды. Аталған жарысқа Беларусь, Қырғызстан, Ресей, Тәжікстан және Қазақстан командалары бақ сынады.
Халықаралық додаға ТМД-ға мүше елдердің Шекара әскерлері қолбасшылары кеңесі төрағасының орынбасары генерал-майор Владимир Моисеенко, ҰҚК Шекара қызметі директорының бірінші орынбасары – бас штаб бастығы, полковник Бауыржан Абсаматов, ҰҚК Шекара қызметі Алматы облысы бойынша департаментінің бастығы, полковник Әлібек Каюпов және басқа да лауазымды тұлғалар қатысты.
Осымен 27-ші мәрте өткізіліп отырған турнир еліміздің Әнұранымен ашылған соң алқалы жиынның алғашқы сөзі В.Моисеенкоға берілді. Владимир Григорьевич өз елдерінің намысын қорғауға тастүйін дайын тұрған командаларға жеңіс пен сәттілік тіледі. Бұдан кейін сөз тізгінін Бауыржан Абсаматов алып, Жеңістің 80 жылдығын ұлықтаған турнирдің маңызына тоқталды.
– Бұл халықаралық турнир – бейбітшілік пен ынтымақтың символына айналған маңызды алаң. Бауырлас мемлекеттердің жас ұрпағын бір арнаға тоғыстырып, ортақ тарихты, жауынгерлік рухты дәріптейтін үлкен тағылым мектебі. Қоян-қолтық ұрыс – физикалық төзімділікпен қатар рух пен ерік-жігерді сынға салатын тартысты спорт, – деді Бауыржан Абсаматов.
Сонымен, бес мемлекеттің ең мықтылары бас қосқан сайыстың ашылу рәсімінен кейін аламан тартыс басталды. Әрбір жекпе-жек ерлік пен кәсіби шеберліктің көрінісіне айналды. Қазақстан құрама сапында өнер көрсеткен Шәкәрім Әбен қарсыласын көз ілеспес жылдамдықпен нокаутқа жіберіп, үш минуттық ұрысты жеңіспен аяқтады. Осынау тамаша дәлдік пен шеберлік залдағы қаншама жанкүйерді жағаға лап қойған асау толқындай ду еткізді. Әрине, мұндай жарқын сәттер аз болған жоқ, әсіресе қазақ спортшыларымен бірге Ресей, Қырғызстан, Тәжікстан командалары да бір-біріне дес бермеді.
Жалпыкомандалық сайыста 1-ші орынды Ресей елінің командасы жеңіп алса, 2-ші орынға қазақстандық спортшылар көтерілді. Ал жүлделі үшінші орынды Қырғыз елінің командасы иеленді.
Турнирдің соңы көтеріңкі көңіл-күй сыйлаған тамаша концерттік бағдарламаға ұласты. Осылайша, Жеңістің 80 жылдығын ұлықтаған турнир өз мәресіне жетті.
Тамара ДӘУЛЕТБАЕВА,
ҰҚК Шекара қызметінің запастағы подполковнигі
