17 тамызда «Байсерке» аэродромында «Байсерке аспаны – 2025» авиашоуы өткізілмекші. Айтулы шараға дайындық барысы Алматы қаласында өткен баспасөз мәслихатында баяндалды.
Брифингте сөз алған ҚР шағын авиация қауымдастығының президенті Өмірбек Кеңесбаев авиашоудың сала үшін маңыздылығын атап өтті. Ол бұл шараның шағын авиацияны, техникалық мамандықтарды және кәсіби әріптестікті насихаттау алаңы ретіндегі рөліне тоқталды.
Келесі кезекте сөз сөйлеген Visit Alatau Туристік ақпараттық орталығы директорының орынбасары Қайрат Садық шара Алматы облысының әкімдігі, облыстық туризм басқармасы және Visit Alatau тарапынан қолдау тауып отырғанын жеткізді. Бұл ішкі туризмді дамытуға және жастарды патриоттық рухта тәрбиелеуге ықпал ететінін, қолдау шаралары қатарында Алматы-Өскемен күре жолынан аэродромға дейінгі кіреберіс жолды салу, өртке қарсы және медициналық қауіпсіздікті қамтамасыз ету, патрульдеу мен турникеттерді ұйымдастыру, шаттлдардың жұмысы мен автотұрақ аумағын жабдықтау бар екенін айтты.
«Азаматтық авиация академиясы» АҚ Авиациялық колледжінің директоры Әлжаппар Сәретбаев болса, биыл Академияның 30 жылдығы атап өтілетінін баяндады. Ол студенттердің осындай шараларға қатысуының маңыздылығын атап өтіп, авиашоу жастардың авиация саласындағы мамандықтармен жақынырақ танысуына мүмкіндік беретінін алға тартты.
«Тянь-Шань ұшу орталығы» авиациялық компаниясының бас директоры Владимир Анцупов авиашоудың ерекшелігін баяндап, биылғы бағдарламаның мазмұны терең, көрінісі әсерлі және шабыттандырарлық болатынына сенім білдірді.
«ОТАН» аэроклубы мекемесінің басшысы Юрий Ельцов ұшу бағдарламасы дайындық кесте бойынша жүріп жатқанын мәлімдеді. Қатысушылар құрамы мен соңғы ұшу жоспары кейінірек жарияланатынын жеткізді.
Спикерлердің сөзінше, «Байсерке аспаны – 2025» авиашоуы бүкіл отбасы үшін нағыз мерекеге айналмақ. Бір күн бойы Байсерке аспанында әсерлі әуе көрсетілімдеріне орын беріліп, парашютпен секіру, ашық аспан астындағы авиациялық техника музейі, балаларға арналған ойын алаңдары мен шеберлік сабақтары, концерттік бағдарлама ұсынылады. Әуе шары ұшырылады.
Шараны ұйымдастырушылардың басты мақсаты – әр қонаққа ерекше шабыт сыйлап, аспан әлеміне деген сүйіспеншілікті арттыру, жастардың ұшқыш болуға деген құштарлығын ояту.
Ұйымдастырушылар авиашоуды тамашалау 14 жасқа дейінгі балалар мен зейнеткерлер үшін тегін (алдын ала тіркелу арқылы) екенін де еске салды. Ал 24 жасқа дейінгі жастар үшін билет бағасы 500 теңгені құрайды. Келушілер үшін «Стандарт», сондай-ақ қосымша жайлылықтармен «Комфорт» және «Бизнес» санаттары қолжетімді.
Брифинг барысында БАҚ өкілдеріне авиашоу логотипі бар арнайы брендтік футболкалар мен серіктестерден сыйлықтар берілді.
Қуат Қайранбаев
Алматы қаласы
