Талғар аудандық Мәдениет үйінде үш бірдей мереке – Жұмысшы мамандықтары жылы, Ұлы Жеңістің 80 жылдығы және әйгілі күйші-композитор, Қазақстанның Халық қаһарманы Нұрғиса Тілендиевтің 100 жылдығына арналған «Өнер мектебі» қосымша білім беру мекемесі оқушыларының «Жас талант – жарқын болашақ» атты жылдық есеп беру концерті болып өтті.
Ауқымды шара жұмысшы мамандықтары жылына байланысты, фойедегі аталмыш мектептің киімді көркемдеп, үлгілеп тігу бөлімі тігіншілер сыныбы оқушыларының жұмыстарын таныстырудан басталды. Заманауи тігін машинасында жұмыс істеуге жақсы дағдыланған жас тігіншілер өздерінің ұқыпты іс-қимылдарымен шараға келген ата-аналар мен арнайы шақырылған қонақтарды әбден сүйсіндірді. Жиналған жұрт одан әрі мольберттерде қатар тұрып, сурет салып жарысқан жас суретшілердің өнерін тамашалап, ол тақырып аясы кең сурет көрмесіне ұласты. Осының бәрі құлаққа өте жағымды естіліп, айналаны сазды әуенге бөлеген жас скрипкашылардың орындауындағы сиқырлы музыканың сүйемелдеуімен өтті.
Шараның негізгі бөлімінде Өнер мектебінің оқушылары өз оқытушыларымен бірге еліміздің жан-жақты дамуы үшін жұмысшы мамандықтарын меңгерудің маңыздылығы, адал еңбек адамды әрқашан абырой мен бақытқа бөлейтіндігі, сондай-ақ ата-әжелеріміздің Ұлы Жеңіске соғыс және еңбек майданында қосқан өлшеусіз үлесі жайында сахналық қойылымдар көрсетті. Сұрапыл жылдардағы сұмдық оқиғалар шынайы сәулеленген бұл көріністер жиналған жұртты ерекше әсерге бөледі. Оқушылар дәулескер күйші, орындаушылық шеберлігі өте ерекше, «Ата толғауы», «Аққу», «Әлқисса» сияқты керемет күйлер шығарған, ондаған ұлттық кинофильдерге музыка жазған әйгілі композитор Нұрғиса Тілендиев жайында әңгімелеп, шығармаларын орындады.
Шара соңы дарынды оқушылардан құралған хор, «Ұлар» оқушылар оркестрі, «Әгугай» дәстүрлі әншілер ансамблі, «Желмая» қобызшылар ансамблі, баяншылар квинтеті, домбырашылар квартеті, пианистер ансамблі, әнші-бишілер тобы және мектеп ұстаздарынан құралған ұлттық аспаптар ансамблінің үлкен концертіне ұласты.
– «Өнер мектебі» қосымша білім беру мекемесінің негізгі міндеті – балалар мен жасөспірімдердің бос уақытын тиімді пайдаланып, жан-жақты дамуына ықпал ету. Сондай-ақ құқық бұзушылықтың алдын алып, оларды саналы өмірге баулу, еліміздің өнері мен мәдениетін дамытатын азаматтар болып қалыптасуы үшін кәсіптік бағдар беру. Қазіргідей жыл өткен сайын техника мен технология, жасанды интеллект дамып, сарапшы-ғалымдар келешекте бірқатар мамандықтарға деген сұраныс азаятынын айтып жатқан заманда бұл өте маңызды деп санаймыз, – дейді мектеп директоры Гүлбағила Асқарбекова.
Шынында да жас талант, мейлі ол жұмысшы, инженер, дәрігер немесе өнерпаз болсын, өмірдегі өз орнын тауып, ертең қоғамда сұранысқа ие болуы үшін оған дұрыс бағыт көрсетіліп, қажетті білім, өнегелі тәлім-тәрбие берілуі керек. Сонда ғана ол өз кетігінің қажетті кірпіші болып қаланады, сонда ғана оның келешегі жарқын болады.
Құтмағамбет ҚОНЫСБАЙ
