Алматы облысының медицина қызметкерлері ақ халатын спорт киіміне ауыстырып, жыл сайын Медицина қызметкерлері күніне орай ұйымдастырылатын спартакиадаға белсене қатысты. Олар Қарасай ауданындағы «Нұр-Аман» спорт кешенінде шағын футбол, волейбол және үстел теннисінен жарысқа түсті.
Шараның ашылу салтанатында сөз сөйлегендер салауатты өмір салтын ұстану, спортты серік ету – денсаулық кепілі екенін тілге тиек етті.
«Медицина қызметкерлерінің жұмысы оңай емес. Олардың тәніне де, жанына да салмақ көп түседі. Сондықтан ақ халатты абзал жандар да үнемі дене жыттығуын жасауды әдетке айналдырғаны абзал. Спорт адамды сергітіп, көңіл-күйін көтереді. Қатысушылар аталған чемпионаттан бір серпіліп қайтатыны анық. Спартакидаға жеңіске деген жігермен бақ сынауға келген барша әріптестерге сәттілік тілеймін», – деді Алматы облыстық денсаулық сақтау басқармасы басшысының орынбасары Әлімбек Тәжеков.
Спартакиадаға 300-ден астам медицина қызметкерлері қатысты. Барлығы 19 команда. Олардың арасында дәрігерлер, мейірбикелер, «Жедел жәрдем» орталығының және тағы басқа медициналық ұйымдардың мамандары болды.
Жарыс қорытындысы бойынша, ерлер арасында өткен үстел теннисінен Смағұл Алтай (Қонаев қаласындағы көпсалалы аурухана), ал әйелдер арасында Лиза Қаматай (Жамбыл ауданындағы орталық аурухана) жеңімпаз атанды. Шағын футболдан облыстық онкологиялық диспансер командасы үздік шықты. Волейболдан Шелек ауруханасының қызметкерлері топ жарды. Жалпы командалық есепте 1-орынды Шелек аудандық ауруханасы алды, 2-орын аймақтық физио-пульманологиялық орталыққа бұйырды, ал 3-орынды облыстық «Жедел жәрдем» станасасы иеленді.
Жеңімпаздар мен жүлдегерлер медаль, грамота және ақшалай сыйлықтармен марапатталды.
