Облыстық орталық әмбебап кітапханасында Қазақстан Жазушылар одағының мүшесі, баспагер әрі балалар жазушысы Қанат Қайымның «Алтын балық» кітабының таныстырылымы өтті. Әдеби шараға өңірдегі зиялы қауым өкілдері, белсенді оқырмандар, ақын-жазушылар, кітапхана қызметкерлері, мұғалімдер мен оқушылар қатысты.
Салтанатты рәсімде Қанат Қайым жиналған көпшілікпен сырлы сұхбат құрды. Кітаптың жазылу барысы мен кейіпкерлер идеясын сөзіне арқау етті. Мұқағали Мақатаев атындағы №140 мектеп-гимназиясының оқушылары «Ырыс алды – ынтымақ» әңгімесі негізінде сахналық көрініс әзірлеп, бірлік пен бауырмалдыққа үндейтін туындының мазмұнын аша түсті. Автордың шынайы тілмен, көркем бейнелеу арқылы балаларды жақсылыққа, адалдық пен еңбекқорлыққа тәрбиелеуге бағытталған шығармасы көпшіліктің көңілінен шықты.
Кешті қорытындылаған кітапхана басшысы Ғалия Сламбайқызы жазушыға алғыс білдіріп, иығына шапан жауып, шығармашылық табыс тіледі. Оқырмандар жас буынның рухани әлемін байытатын «Алтын балық» кітабының алғашқы даналарына автордан қолтаңба алып, естелік суретке түсті.
Әлия БОРАНБАЙ,
облыстық орталық әмбебап кітапханасының қызметкері
