Қазір жер-жерде отбасылық жанжалдарды шешу, өмірде қиын жағдайға тап болған жандарға қолдау көрсету, жәрдемдесу мақсатында Отбасын қолдау орталықтары ашылуда. Сондай маңызды мекеме Ұйғыр ауданында да өз жұмысын бастады.
«Отан отбасынан басталады», «Ұяда не көрсең, ұшқанда соны ілесің» деген атам қазақ. Адамның ұшқан ұясы – тәрбие бастауы. Отбасындағы тәрбие дұрыс болмаса, бала да бақытты бола алмайды. Күн сайын ақпарат көздерінен әйеліне әлімжеттік көрсеткен, баласын қорлаған, қызын зорлаған жаға ұстатарлық оқиғаларды естіп жанымыз ауырады. Бұл – бүгінгі қоғамның дерті. Аталған орталық осындай орны толмас қиыншылықтың алдын алу мақсатында құрылған. Ұйғыр ауданы әкімінің орынбасары Ерасыл Толымбекұлы ашылу салтанатында орталықтың атқаратын жұмысына сәттілік тіледі.
Облыстық Жұмыспен қамту және әлеуметтік бағдарламалар басқармасының басшысы Айгүл Ахметова елімізде зорлық-зомбылық көріп, қиын жағдайға тап болған отбасылардың күн санап артып отырғанын терең күйзеліспен сөз етті. Келешегіміздің жарқын болуы үшін өскелең ұрпақтың отбасында тәлім-тәрбие алып, ұлттық құндылықтарды бойына сіңіруі өте маңызды. Салт-дәстүрге құрмет те, туған елге сүйіспеншілік те қасиетті қара шаңырақтан бастау алады. Отбасы институты еңбекқорлық, білімпаздық, тілектестік сынды адал азаматқа тән қасиеттерді қоғамда жан-жақты дәріптеу арқылы ұлттың жаңа сапасын қалыптастыруға өлшеусіз үлес қосады. Айгүл Матанқызының ой-пікірін Алматы облысының бас имамы Мадияр Пірімқұлов ары қарай жалғап, дін – отбасы тәрбиесіндегі басты құралдың бірі екенін тілге тиек етті. Ал Ұйғыр аудандық аналар кеңесінің төрағасы Күлжахан Әликеева түрмесіз түнін батырған, құлпысыз таңын атырған, жетімсіз жер басып, жесірсіз күнелткен халқымыздың бүгінгі ұрпағы жаһанданудың жалынына шырмалып, түрлі батыстық менталитетке бас ұрып, отбасын ойран етіп, шаңырағын шайқалтып, жетімдер мен жалғыз басты аналардың саны артып, қарттарымызды қараусыз қалдырып жатқан жайымыздың үлкен қасірет екенін айтып, осы келеңсіздіктің алдын алуда Отбасын қолдау орталығының маңыздылығын атап етті. Бұл орталыққа көп жылдық тәжірибесі бар Гаухар Шавдинованы басшы етіп тағайындаудың өзі дұрыс таңдау екенін, оның қол астындағы жігері жалын атқан ондаған жастың бұл жұмысты алаңсыз алып жүретініне жиналған көпшілік сенім білдірді.
Анар Дүйсенбайқызы
Ұйғыр ауданы
