Облыстық «Тіл» оқу-әдістемелік орталығының Ұйғыр аудандық филиалында жұмыс істегеніме көп болған жоқ. Бірнеше ай ғана уақыт өтті. Дегенмен осы аз уақыттың өзінде мен үлкен тәжірибе мектебінен өттім. Бұл орталық тек қана тіл үйретіп қоймайды. Ана тілі арқылы ұлтқа, елге деген сүйіспеншілікті арттыруға да өз үлесін қосып келеді.
Біз алдымызға келген әрбір тіл үйренушіге мемлекеттік тілдің маңызын ұғындырамыз. Сонымен қатар түрлі сайыстарға түсіп, біліктілігімізді арттырамыз. Өзіме үлкен тәжірибе мектебі болған шараның бірі – Қонаев қаласында облыстық тілдерді дамыту жөніндегі басқарма мен облыстық «Тіл» оқу-әдістемелік орталығы ұйымдастырған Ахмет Байтұрсынұлы атындағы дәстүрлі «Үздік оқытушы» байқауы.
Бұл байқау – мемлекеттік тілді оқыту үдерісін жаңғырту, тіл мамандарының кәсіби шеберлігін арттыру, тиімді әдістемелер мен жаңа тәсілдерді кеңінен тарату, сондай-ақ Ахмет Байтұрсынұлының әдістемелік мұрасын қазіргі заман талабына сай қолдануға бағытталған маңызды шара. Сонымен қатар оқытушылар арасында өзара тәжірибе алмасуға жол ашты.
Облыстың әр ауданынан іріктеліп келген 10 оқытушы үш кезең бойынша сынға түсіп, тіл үйретудегі шығармашылық әдістерін ортаға салды. Мен де осы шараға қатысу құрметіне ие болдым. Жүлделі орын алмасам да, әріптестерімнің жұмыс тәсілін көріп, өз ісіме жаңаша көзқараспен қарауға мүмкіндік туды. Бұл байқау кәсіби дамуға бағыт сілтеген маңызды баспалдақ болды.
Іс-шара жоғары деңгейде ұйымдастырылды. Қатысушылар арасында өзара қолдау мен түсіністік, әділқазылардың әділетті бағасы – барлығы да байқаудың маңызын арттыра түсті. Мұндай шаралар – оқытушылардың кәсіби шеберлігін арттыруға ғана емес, сонымен қатар ынталандыру мен жігер беруге зор мүмкіндік.
Айдана Бұлжұма,
Облыстық «Тіл» оқу-әдістімелік орталығы Ұйғыр аудандық филиалының оқытушысы
