Беларусь елінде халықаралық «ProfSkills Belarus – 2025» кәсіби шеберлік байқауы өтті. Аталған жарыста кәсіпкер-меценат, облыстық мәслихаттың депутаты, жерлесіміз Серікхан Әділханов халықаралық сарапшылар қатарында болды.
Серікхан Сәметұлының айтуынша, байқаудың салтанатты ашылу рәсімі Минск қаласындағы «Чижовка-Арена» спорт кешенінде өтті. Оған 400-ден аса колледж, жоғары оқу орындарының студенттері мен жас жұмысшылар қатысып, 50 номинация бойынша сынға түсті. Сонымен қатар Ресей, Қазақстан, Өзбекстан, Әзербайжан, Қытай, Зимбабве және Пәкістаннан 100-ден астам шетелдік қатысушы келген.
– Мен аспаздық өнер сайысында тағамның дәмін тексеретін (blind tasting) сарапшы ретінде шақырылдым. Жас аспаздар мен кондитерлердің тағамдары әртүрлілігімен және ерекшелігімен қуантты. Биылғы байқаудың жаңалығы – бір тағам табақта ұсынылса, екіншісі қорапта болды, яғни жылдам жеткізуге арналған. Сондықтан тағамның дәмі мен түрі ғана емес, оның жеткізілуі мен қаптамасына да жеке баға берілді. Бұл бүгінгі күннің талабына сай келетін өте орынды бастама деп есептеймін. Мұндай байқаулар жастар үшін жақсы мотивация әрі ынталандыру көзі екені сөзсіз.
Байқау қорытындысы бойынша «Мобильді робототехника» құзыреттілігі номинациясында Оңтүстік Қазақстан облысының өкілі күміс медаль иеленді. Қазақстандық делегацияның негізгі бөлігі Батыс Қазақстан облысынан болды.
Бұл шара да жастардың кәсіби біліктілігін арттыруға және тәжірибе алмасуға зор үлес қосқаны сөзсіз.
Қуат Қайранбаев
Қарасай ауданы
