Жеңістің 80 жылдығы мен Әлия Молдағұлованың 100 жылдығына орай Мәдениет және ақпарат министрлігінің қолдауымен бастау алған «Ардагер өсиеті» республикалық жастар марафоны Алматы облысына жетті. Қазақстан Республикасы Мәдениет және ақпарат министрлігінің қолдауымен болған бұл рухани эстафетаның мақсаты – жастарды ұлттық құндылықтарға баулу, дәстүрлі өнерге деген құрметті арттыру, ұрпақтар сабақтастығын нығайту, тарих пен ата-баба ерлігіне құрмет көрсету. Қонаев қалалық ардагерлер саябағында облыстық жастар ресурстық орталығының ұйымдастыруымен өткенге тағзым, келер ұрпаққа өнеге болатын салтанатты шараға облыстық басқармалардың, қоғамдық бірлестіктердің өкілдері, ардагерлер, жастар мен еріктілер қатысты.
Жиынды ашқан облыстық жастар саясаты басқармасы басшысының міндетін атқарушы Ләззат Мырзабекова Қазақстан Республикасы Мәдениет және ақпарат министрлігінің ұйытқы болуымен Ақтөбе қаласынан басталып, еліміздің батыс және оңтүстік өңірлерін аралап, Қонаев қаласына келіп отырған «Ардагер өсиеті» республикалық жастар эстафетасының жастар үшін рухани маңызын атап өтті. Ләззат Оразбекқызы ұрпақтар сабақтастығын терең сезіндіретін тағылымды шараның бабалар аманатын арқалаған жастардың бойына отансүйгіштік рухты сіңіруге үлес қосып, тарихи жауапкершілігін арттыруға септігін тигізетінін жеткізді. Сондай-ақ бұл «Ардагер өсиеті» деп аталатын хаттың жай қағаз емес, халықтың амандығы мен болашаққа деген сенімінің, ел мен жерге деген махаббаттың, Отан үшін от кешкен ардагерлерге деген құрметтің, өткенді ұмытпай, болашаққа үмітпен қараудың белгісі екенін баса айтты.
Келесі кезекте Қонаев қалалық ардагерлер кеңесінің төрағасы Базарбай Оралбаев пен Қонаев қаласының Құрметті азаматы Қанат Жақыпов батыр бабалардың рухына тағзым ету бүгінгі ұрпақтың парызы екенін қаперге салып, жастарды елге қызмет етуге, тарихты ұмытпауға шақырды.
Осынау тарихи сәтте сөз алған Алматы қаласы Наурызбай ауданы қауымдастық орталығының басшысы Ермұхамед Палмағанбетов «Ардагер өсиеті» хатын Ләззат Мырзабековаға салтанатты түрде табыстады. Облыстық жастар ресурстық орталығы ұйымдастыру бөлімінің маманы Аяулым Сәрсенбаева соғыс ардагерлері атынан арнайы жазылған бұл өсиет-хатты көпшілікке оқып берді. Аманат хатта Отанды сүю, елге адал қызмет ету, тәрбие мен ұлттық құндылықтарға байланысты терең ойлар, ата-ананы қадірлеу және білім алуға ұмтылу жайында ақыл-кеңестер жазылыпты.
Салтанатты шара барысында жиналған қауым Даңқ мемориалы ескерткішіне гүл себеттерін қойып, Екінші дүниежүзілік соғыста қаза тапқан боздақтар рухына тағзым жасады. Алматы облысы ендігі кезекте марафон эстафетасын Жетісу облысына жолдады.
Айжарық КӨПТІЛЕУОВ
Қонаев қаласы
