Адам еріншектікке салынбай, кез-келген кәсіпті қолға алып, сол кәсіппен тұрақты айналысса, еш уақытта несібесіз қалмайды. Ал еңбек еткен адам қоғамға пайда келтіріп қана қоймай, ол өзінің жарқын болашағына жол аша алады. Бүгінгі әңгіме кейіпкері де өзінің сүйікті кәсібімен тұрақты айналысып, ел-жұртқа танымал болған диқандардың бірі – Алтынғали Қанапияев.
Ақжар ауылында туып-өскен Алтынғали мектеп қабырғасында оқып жүрген кезінде диқан болуға бет бұрып, кейіннен сол кәсіптің қыр–сырын жетік меңгереді.
Адал еңбек пен адал табыс тауып, бау-бақша өнімдерін өсіруді жаны қалаған диқан бүгінгі таңда «Ақдала Өтес» жауапкершілігі шектеулі серіктестігінің егіс алқабынан 5 гектар суармалы жер алып, оның 4 гектарына картоп отырғызса, қалған егіс алқабына бақша өнімдерін еккен.
Он саусағынан өнер тамған диқан 1995 жылдан бастап Бақбақты, Береке және Ақдала егіс алқаптарында бау-бақша өнімдерін егумен тұрақты айналысып жүр.
Жұмысшымен арнайы сұхбаттасқанымызда ол: «Кез келген өнімнің жемісті болуының сыры оны күтіп-баптауында. Кәсібіңді жан қалауыңмен жүргізсең, қай саланың болсын шыңына шығуға болады», – деп, өз кәсібіне деген адалдығын ұғындырды.
Иә, расымен де еңбек адамы деп өзінің кәсібін терең меңгерген Алтынғали сынды азаматты айтуға болады. Өйткені ол, қоғам тынысына дем беріп, бейнеті мол саланың шын шебері атанған жан. Жер-Ананың құт қойнауынан несібе теріп, диқаншылықтың астарында даналық жатқанын сезініп, өз кәсібінің биік белесін бағындырып жүрген еңбек сүйгіш азаматтың алдағы ісіне тек береке тілейміз.
Бақтығали ДӘУІТБАЕВ,
Балқаш ауданы
