Қонаев қалалық кітапханасы ширек ғасырдан аса оқырман қауымның басын қосатын, халықтың жандүниесін байытуға өз үлесін тигізетін рухани орталық ретінде қала тұрғындарына қызмет етіп келеді.
Жаңғыртудан кейін жаңа кейіпке енген бұл ғимарат облыстағы маңызды кітапханалардың біріне айналды. Кітапхана – тек жинақталған кітап қоры ғана емес, қызықты іс-шараларға, пікір алмасуға, оқырмандардың әлеуметтік және кәсіби дағдысын дамытуға, тәжірибе алмасуға арналған орын.
Жуырда кітапханада өткен «Креативті кітапхана кеңістігі» атты шараға қалалық білім бөлімінің кітапхана ісі жөніндегі жетекші маманы Аршагүл Ахметова, мектептердегі кітапхана мамандары қатысты. Әріптестер мұндағы әр бөлімді аралап, оқырманға ұсынылатын қызмет түрлерімен жан-жақты танысты.
Аталған шарада Аршагүл Ахметова кітапхана қорын дамыту, сандық қызмет, инновациялар туралы кеңінен әңгімеледі. «Өлкетану бағытындағы жұмыс түрлері», «Кітапханалық зертхана» сынды шығармашылық алаңдар жұмыс істеп, тәжірибелік сабақтар өтті. Кітапхана мамандары іс-шараның маңыздылығын атап өтіп, цифрландыру, оқырмандардың қызығушылығын арттыру және кітап оқу мәдениетін қалыптастыру жолындағы мәселелер төңірегінде пікір алмасты.
Кітап – ұлтты тәрбиелейтін, елді өркениетке жетелейтін ең құдіретті күш. Жаңа технологиялар заманында да кітап адамның ой-өрісіне терең ықпал етіп, рухани азық береді. Ақпарат кеңістігі тез өзгеріп жатқан қазіргі уақытта кітапханалардың шығармашылық және озық ойлы тұлға қалыптастырудағы рөлі бұрынғыдан да маңызды. Бүгінгі күні кітапхана қызметкерлері білім мен мәдениеттің дамуына өлшеусіз үлес қосуда.
Кездесуде әріптестердің кітапхана қызметін жақсартуға деген ынта-ықыласына тағы да көзіміз жетті.
Даража Жолымбетова,
Қонаев қалалық кітапханасының
бөлім меңгерушісі
