Қоғамда тәртіп пен тұрақтылықтың сақталуы – елдің өркендеуінің басты шарттарының бірі. Алатау қаласында да бұл бағытта кешенді жұмыстар атқарылып келеді. Азаматтардың құқықтық сауаттылығын арттыру, құқық бұзушылықтың алдын алу және заңға бағыну мәдениетін қалыптастыру – күн тәртібіндегі маңызды міндеттердің бірі.
Әрбір тұрғын өз құқығын білумен қатар, өзіне жүктелген міндеттерді де орындауы қажет. Заңдарды сақтау – тек мемлекеттік органдардың емес, барша азаматтардың ортақ парызы. Қоғамдық орындарда тәртіпті сақтау, көршілермен сыйластықта өмір сүру, кәмелетке толмағандарды тәрбиелеу, жол қауіпсіздігін сақтау – бұлардың барлығы жай ғана ережелер емес, ортақ өмір сүру мәдениетінің негізі.
Алатау қаласының Ішкі саясат бөлімі мен құқық қорғау органдары тұрғындар арасында заңнаманы түсіндіру және құқықтық мәдениетті қалыптастыру бағытында түрлі кездесулер, семинарлар, түсіндіру жұмыстарын жүргізуде. Жергілікті мектептер мен жастарға құқықтық тәрбие беру шаралары ұйымдастырылуда. Бұл өз кезегінде жасөспірімдер арасындағы құқық бұзушылықтың алдын алуға ықпал етеді.
Қала тұрғындарына прокуратура және ішкі істер органдары тарапынан құқықтық кеңес алу мүмкіндіктері де қарастырылған. Бұл — халық пен құқық қорғау органдары арасындағы сенімді арттыруға бағытталған оң қадам.
Алатау қаласының әрбір тұрғыны заңды құрметтеп, тәртіпті сақтау арқылы қоғамдық қауіпсіздік пен тұрақтылыққа өз үлесін қоса алады. Заңға бағыну – бейбіт өмірдің, әділетті қоғамның кепілі.
Молдабаев Қанат
Алатау қаласы
