Әлемнің ең үздік ойыншылары бас қосқан «Qonaev Cup – 2025» халықаралық шахмат фестивалі мәресіне жетті. Қарасай ауданындағы Олимпиадалық даярлау орталығында өткен бұл турнир биылғы Қазақстан кубогының классикалық шахмат бойынша үшінші, яғни қорытынды кезеңі болды.
Осынау спорт додасын Қазақстан шахмат федерациясы, ҚР Туризм және спорт министрлігі, облыстық дене шынықтыру және спорт басқармасы ұйымдастырып, «Freedom Holding Corp» компаниясы бас демеушілік жасағанын айта кету керек.
Стандартты шахматтан жарыстар швейцариялық жүйе бойынша 9 кезеңде, классикалық уақыт бақылауымен – 1,5 сағат + әр жүріске 30 секунд қосылатын форматта өтті. Турнир Masters, Challengers және Open санаты бойынша ұйымдастырылды.
«Qonaev Cup 2025» аясында өткен жоғары санаттағы «B» блиц-турнирінде ирандық супергроссмейстер Пархам Магсудлу жеңіске жетті. Айтулы жарысқа 16 елден 6 жастан 70 жасқа дейінгі 260-тан астам шахматшы қатысты.
«Masters» санатында 62 ойыншы бақ сынады, оның ішінде 21 гроссмейстер және 24 халықаралық шебер болды. Нәтижесінде 1-орын – Адитья Миттал (Үндістан), 2-орын – ГМ Алексей Гребнев (FID) және 3-орын ГМ Бассем Аминге (Мысыр) бұйырды.
«Challengers» санатында Әбілмансұр Әбділқайыр (Қазақстан), Константин Корниенко (FID), Бақтияр Асқаров (Қазақстан) жүлдегерлер қатарынан көрінді.
«Open» санаты бойынша Азамат Нұрдинов (Қырғызстан), Төрехан Молбай (Қазақстан) және Айбек Тілекқабыл (Қазақстан) үздік шықты.
Қарасай ауданы
