Мемлекеттің тұғыры, бірлік пен тұрақтылықтың кепілі болып, еліміздің әрбір азаматының құқығын қорғап келе жатқан Ата Заңның қабылданғанына 30 жыл толып отыр. Осынау тарихи мәні зор мереке қарсаңында Қонаев қаласындағы көпбалалы және тағы басқа санаттағы тұрғын үй кезегінде тұрған азаматтар баспаналы болды. «Қарлығаш» шағынауданында қоныс тепкен жеке тұрғын үйлердің кілтін табыстау рәсіміне әкімдік қызметкерлері, қоғамдық ұйымдардың өкілдері мен қала тұрғындары қатысты.
Салтанатты жиында сөз Қонаев қаласының әкімі Асхат Бердіхановқа берілді.
– Тұрғындар үшін сенімді болашақ пен әлеуметтік кепілдікті қамтамасыз ету – мемлекеттің негізгі бағытының бірі. Осы орайда Мемлекет басшысы Қасым-Жомарт Тоқаев тұрғын үймен қамтамасыз ету мемлекеттік-әлеуметтік саясаттағы басымдық екенін айтып, баспана мәселесіне баса назар аударған болатын. Бүгінде Қонаев қаласында 4 мыңға жуық адам кезекте тұр. Жыл басынан бері облыс орталығында 80 пәтер пайдалануға берілді. Сонымен қатар халықтың әлеуметтік осал топтары мен жергілікті атқарушы органдардың кезегінде тұрғандар үшін бөлінген 1,7 млрд теңгеге пәтер сатып алу жоспарлануда. Былтыр «Қарлығаш» шағынауданында «R&M Construction» ЖШС салған бірқабатты 18 тұрғын үй облыс әкімдігі тарапынан сатып алынды. Бүгінгі салтанатты шарада сол үйлердің кілтін Қонаев қаласында кезекте тұрған түрлі санаттағы азаматтарға табыстағалы тұрмыз, – деген шаһар басшысы жыл соңына дейін 224 пәтер сатып алынып, кезекте тұрған әлеуметтік осал топтағы азаматтарға берілетінін айтты.
Келесі кезекте Асхат Ермекұлы 10 отбасына тұрғын үйдің кілттерін салтанатты түрде табыстады. Баспана бақытына ие болған Анастасия Нетисова сөз алып, қолына тұрғын үйдің кілтін алған кездегі қуанышын сөзбен жеткізе алмай, толқып тұрғанын айтып, баспана машақатын бастарынан кешіп, қиналып жүрген отбасыларға жұғысты болуын тіледі.
Жаңа тұрғын үйдің иесі атанғандардың көптен күткен қуанышын бөлісіп, қонысқа құтты болсын айтып, шашу шашып, ақжарма тілектерін арнаушылардың қарасы мол болды. Соның бірі Қонаев қалалық «Ана сәулесі» қоғамдық бірлестігінің төрағасы Жанат Қалжанова көпбалалы аналардың баспаналы болып жатқанына өзі үйлі болғандай қуанып тұрғанын жасырмады.
Баспаналы болғандардың қуанышын бөлісуге жиналған қауым Динара Тәуірбаева мен Әсем Әлімханованың шаңырағында болып, дастарқаннан дәм татты. Қала әкімі құтты болсын айтып, «R&M Construction» ЖШС өкілі сый-сияпат табыстап, облыстық Қазақстан халқы Ассамблеясы төрағасының қоғамдық орынбасары Амангелді Беспаев ақ батасын берді.
Осы орайда бұл жерүйлердің пәтер сатып алу құқығымен жалға беріліп отырғанын, оны алғашқы жарнасын төлеу арқылы жекешелендіріп алуға мүмкіндік болатынын атап өткен жөн.
Қонаев қаласы облыстың жаңа орталығы болғаннан бастап мұнда тұрғын үй құрылысы қарқын алуда. Алдағы уақытта қала бойынша жалпы аумағы 161 мың шаршы метр болатын 72 тұрғын үй бой көтермек. Жыл соңына дейін баспанамен қамтылған отбасы саны 200-ден асады деп күтілуде.
Айжарық КӨПТІЛЕУОВ
Қонаев қаласы
