Облыс әкімі Марат Сұлтанғазиев «Атамекен» ұлттық кәсіпкерлер палатасы төралқасының төрағасы Райымбек Баталовпен және облыстық өңірлік кәсіпкерлер кеңесінің мүшелерімен кездесу өткізді. Онда кәсіпкерлерді қолдау мақсатында нақты ұсыныстар талқыланып, өңір экономикасын нығайтуға бағытталған өзекті мәселелер сараланды.
Облыс әкімінің айтуынша, өткен жылмен салыстырғанда биыл шағын және орта бизнес субъектілері 107,6 %-ға, бұл салада жұмыспен қамтылғандар 8,4%-ға артқан. Олар өндірген өнім көлемі 123,4 %-ға өсіп, 994,5 млрд теңгені құраған. Ал салық түсімдері қаңтар-маусым айларында 150,6 млрд теңгеге жетіп, 34,5 %-ға көбейген.
– Облыс әкімдігі кәсіпкерлерді қолдау үшін нақты шаралар қабылдауда. Биыл бұл бағытта жергілікті бюджеттен 6,2 млрд теңге бөлінді. 4,6 млрд теңге пайыздық мөлшерлемелерді субсидиялауға, 1,3 млрд теңге несиелер мен лизингтерге кепілдік беруге, 370 млн теңге жастар мен әлеуметтік кәсіпкерлерге грант беруге бағытталған. Гранттық бағдарлама аясында «Даму» кәсіпкерлікті дамыту қоры арқылы 119 жобаға қолдау көрсетіліп, 27-сіне субсидия, 92 жобаға кепілдік берілді, – деген Марат Елеусізұлы өңірдің әлеуметтік-экономикалық дамуының маңызды қозғаушы күші инвестиция екенін жеткізді. Сондай-ақ Алатау қаласы аумағында ауданы 96,5 мың гектарды құрайтын арнайы экономикалық аймақ, сонымен қатар жалпы ауданы 2119,3 гектар жерге 6 индустриялық аймақ құрылған. Бұдан бөлек 9 индустриялық аймақты ашу жұмысы жүргізілуде, оның жетеуі Үлкен Алматы айналма жолының бойына орналаспақ. Индустриялық аймақтардың жол магистралына жақын орналасуы көлік логистикасын жеңілдетіп, инфрақұрылымды тиімді пайдалануға көмектеседі. Қабылданған шаралардың нәтижесінде соңғы үш жылда инвестиция көлемі 60%-ға өсіп, 2 трлн 369 млрд теңгені құраған.
Өңірдегі инвестициялық жобалар облыстық даму орталығы арқылы іске асырылуда. Осы уақытқа дейін орталық 242 кездесу өткізсе, оның 156-сы шетелдік инвесторлармен болған. Ең белсенді серіктес – Қытай Халық Республикасы, олармен 123 кездесу ұйымдастырылған.
– Соңғы үш жылда 1,8 млрд АҚШ долларын құрайтын шетелдік инвестиция тартылған. Аталған көрсеткіш осы бағыттағы жұмыстың жүйелі жүргізіліп жатқанын айғақтайды. Өңірге келетін әрбір инвесторға жан-жақты қолдау көрсетіліп, жобалардың сәтті жүзеге асуына барлық мүмкіндік жасалып жатқанын атап өткен жөн, – деді облыс әкімі.
Әрі қарай сөз кезегін алған Райымбек Баталов кәсіпкерлер мен мемлекет арасындағы тиімді әріптестікті нығайту маңызды екенін айтты.
– Қазақстанда бизнестің дамуына қолайлы жағдай жасау – «Атамекен» ұлттық кәсіпкерлер палатасының басты міндеті. Қазіргі уақытта жергілікті өндіріс үлесін арттырып, өңдеуші өнеркәсіп пен басқа да маңызды салаларды дамыту көзделуде. Президент Қасым-Жомарт Тоқаев өзінің Жолдауында билік пен кәсіпкерлер арасында тиімді қарым-қатынас орнауы қажет екенін айтты. Бұл бағытта ҰКП белсенді жұмыс жүргізіп келеді. Елімізде 153 салалық кеңес құрылып, онда кәсіпкерлер өздерінің білімі мен тәжірибесін ортаға салып, маңызды мәселелерді бірге шешуге атсалысуда. Алматы облысында сауда, ауыл шаруашылығы, өңдеу өнеркәсібі, энергетика және туризм сияқты салалар жақсы дамып келеді. Бүгінгі таңда мұнда жалпы құны 1,8 триллион теңгеге 90-ға жуық инвестициялық жоба іске асырылуда. Бұл 13000-нан астам жаңа жұмыс орнын ашуға мүмкіндік береді, – деді ол.
Кездесу барысында агроөнеркәсіптік кешенді субсидиялау, су тарифтерінің тиімділігі, салық көлемінің артуы, жекеменшік білім беру ұйымдары мен «Даму» қорының қызметіне қатысты мәселелер көтерілді. Бұл сұрақтарға жауапты басқарма өкілдері берді. Облыс әкімі барлық ұсыныс пен көтерілген мәселелерді ескеріп, тиісті мекемелерге мемлекетке де, кәсіпкерлерге де тиімді болатын шаралар қабылдауды тапсырды.
Гүлзат БАЙҚОНЫСОВА
