Қазақтың ұлы ақыны, ағартушы, философ Абай Құнанбаевтың дүниеге келгеніне биыл 180 жыл толды. Осынау мерейтой аясында Шелек тарихи-өлкетану музейі мен Нұра ауылдық кітапхана қызметкерлері бірлесіп, «Шыңғыстау шыңы» атты кітап көрмесін өткізді.
Абай шығармашылығын насихаттау арқылы жастарға ел мен жер тарихын танытып, олардың бойына ұлттық тәрбиені сіңіруді мақсат еткен көрме көпшіліктің қызығушылығын тудырды.
Артына өлмес, өшпес мұра қалдырған ақынның өлеңдері мен аудармалары, поэмалары мен қара сөздері, сондай-ақ Абай туралы жазылған шығармалар кітапхана оқырмандары мен ауыл тұрғындарының назарына ұсынылды. Жазғы демалыс уақытында көрмеге арнайы келген О.Жандосов атындағы орта мектеп оқушылары іс-шара ұйымдастырушыларына сұрақтарын қойып, пікір алмасты. Абайдың өлеңдері оқылып, өмір жолы жайлы жан-жақты айтылды. Мұндай көрмелер ұлттың рухани қазынасын молайтып, өресі биік, көкжиегі кең жастар қатарының артуына өз үлесін қоса бермек.
Жанар Қашағанова,
Шелек тарихи-өлкетану музейінің қызметкері
Еңбекшіқазақ ауданы
