Қонаев қаласындағы Балаларды қолдау орталығының тәрбиеленушілері әлемдік аренада еліміздің абыройын асқақтатып жүрген спортшылармен кездесіп, жетістікке жету жолындағы сырына қанықты, өздерін толғандырған сұрақтарға жауап алды.
Облыстық дене шынықтыру және спорт басқармасының міндетін атқарушы Рахман Шахарбек: «Шара барысында облыстан шыққан грек-рим күресі, джиу-джитсу, каратэ сынды спорт түрлерінен чемпион атанған спортшыларды жас ұрпаққа таныстырып, ерік-жігерін ұштай түстік. Мақсатымыз – балаларды спортқа баулу, салауатты өмір салтын насихаттау, әлемде мүмкіндіктер шексіз екенін түсіндіру, қолдау көрсету. Алдағы уақытта осы орталыққа жаттықтырушыларды жұмылдырып, балалардың кәсіби тұрғыда спортпен шұғылдануына сеп болғымыз келеді. Мұнда джиу-джитсумен айналысқан балалар бар екен. Әзірге осы спорт түрінен үйірме ашу жоспарда бар. Одан бөлек, футбол, волейбол ойындарына да басымдық беретін боламыз», – деді ол.
Шараға қатысқандардың бірі – грек-рим күресінен әлем чемпионатының күміс жүлдегері және үш дүркін Азия чемпионы, ҚР еңбек сіңірген спорт жаттықтырушысы Қорлан Жақанша. «Спорт саласында жүргеніме 20 жыл болды. Кездесу барысында осы уақытқа дейін жинаған тәжірибемізбен бөлісіп, әсерлі әңгіме өрбіттік. Балалардың спортқа деген қызығушылығы артып, құлшыныстары оянды деп ойлаймын», – деді чемпион.
Кездесуде Қазақстан тарихында аралас жекпе-жектен әлем чемпионатының алтын медалін иеленген Мөлдір Әшірбекова да болды. «Спортта жетістікке жету үшін адамда қайсар мінез, темірдей тәртіп болу керек. Сәтсіздікке еш мойымай, тек алға жылжу – басты талап. Балалардың болашағының жарқын болғанын, дұрыс таңдау жасағандарын қалаймын. Сондықтан бүгінгі шараға келіп, өз ақыл-кеңесіммен бөлістім», – деді.
Ашық әңгімеден кейін балалар спортшылармен бірге түрлі ойындар ойнап, шат-шадыман күйге бөленді.
Гүлзат БАЙҚОНЫСОВА
Қонаев қаласы
