Алматы облысының Райымбек ауданындағы көрікті Сарыжаз ауылында кросстан облыс чемпионаты өтті. Бұл жарыс дәстүрлі түрде өңірдің ең үздік жүйріктерін жинап, күзгі жеңіл атлетика маусымындағы басты старттардың бірі болып саналады.
Ұйымдастырушылардың айтуынша, жарыс жаппай жүгіру спортын дамытуға және жастарды салауатты өмір салтына тартуға үлкен серпін берді.
«Кросстан облыс чемпионаты – бұл тек спорттық сайыс емес, сонымен қатар жастар арасында жеңіл атлетиканы насихаттауға бағытталған маңызды шара. Бүгінде жүгіруге деген қызығушылық артып келеді. Мұндай жарыстар болашақ чемпиондарды дайындауға көмектеседі. Биыл спортшылар өте жақсы нәтиже көрсетті, дайындық деңгейі жоғары. Айта кетейік, бұл біріншілік – 2025 жылғы 6 қазанда Талдықорғанда өтетін Қазақстан Республикасының кросс чемпионатына іріктеу кезеңі», – деді жарыстың бас төрешісі Валерий Ерёмин.
Жарысқа облыстың аудан-қалаларынан 150-ден астам спортшы қатысты. Қатысушылар 13 жастағы жасөспірімдерден бастап ересек кәсіби спортшыларға дейін әртүрлі жас санаттарында өнер көрсетті. Жүгіру қашықтықтары 1000 метрден 8000 метрге дейін созылып, әр спортшы төзімділігі мен шеберлігін көрсетуге мүмкіндік алды.
Жарыс қатпарлы рельефте, яғни қиындығы жоғары жерлерде – өр мен еңісте, тар бұрылыстары бар жолдармен өтті. Бұл спортшылардың физикалық дайындығын ғана емес, мінезін де сынады.
«Биылғы трасса ерекше қиын болды – күрт көтерілу мен тар бұрылыстар спортшыдан шектен тыс зейін мен шыдамдылықты талап етті. Әсіресе соңғы метрлері ауыр тиді, бірақ бапкерім мен командамның қолдауы арқасында жеңіске жеттім. Мұндай нәтижеге өте қуаныштымын», – деді Ұйғыр ауданынан келген 2010–2011 жылғы жасөспірімдер арасындағы жеңімпаз Жарылқасын Рамазан.
Жарыс жеңімпаздары:
• Қыздар (2010–2011 ж.т.): Маликен Аяжан (Райымбек ауданы)
• Ұлдар (2010–2011 ж.т.): Жарылқасын Рамазан (Ұйғыр ауданы)
• Қыздар (2008–2009 ж.т.): Несмачных Ульяна (Талғар ауданы)
• Ұлдар (2008–2009 ж.т.): Ілияс Қайсар (Райымбек ауданы)
• Қыздар (2006–2007 ж.т.): Михайлева Анастасия (Еңбекшіқазақ ауданы)
• Ұлдар (2006–2007 ж.т.): Маликов Кирилл (Талғар ауданы)
• Ересектер: Зейналда Диляра мен Юлдашев Саутжан (екеуі де Еңбекшіқазақ ауданынан)
Командалық есеп бойынша нәтижелер:
1 орын – Еңбекшіқазақ ауданы
2 орын – Райымбек ауданы
3 орын – Талғар ауданы
Жарыс қорытындысы бойынша барлық жас санатындағы жеңімпаздар мен жүлдегерлер медальдармен, дипломдармен және естелік кубоктармен марапатталды. Сонымен қатар, олар алдағы республикалық жарыстарда Алматы облысының намысын қорғау құқығына ие болды.
