Қаскелең қаласынан Алматыға апаратын жол 8 жолаққа дейін кеңейтіліп, бес арнайы көлік эстакадасы салынады. Бұл туралы Алматыға жұмыс сапары аясында барған көлік министрі Марат Қарабаев айтты. Жұмыс Мемлекет басшысының Алматы агломерациясын дамыту жөніндегі тапсырмасы аясында жүргізіледі.
Құрылыс екі кезеңде жүргізілмек. Бірінші кезеңде Үлкен Алматы айналма автомобиль жолынан (ҮАААЖ) Қаскелең өткеліне дейінгі учаске қамтылса, екінші кезеңде Қаскелең өткелінен Әйтей ауылына бұрылысқа дейінгі учаске қамтылмақ. Жобалау жұмыстары басталды.
Аталған шара көлік қатынасын жақсартуға және жол жүру уақытын едәуір қысқартуға мүмкіндік береді деп күтілуде. Аталған учаскедегі өткізу қабілеті тәулігіне 60 мыңнан 90 мың көлікке дейін ұлғаяды. Жолдың кеңеюі кептелістің азаюына ықпал етеді деп күтілуде. Көлік жүргізушілері мен жаяу жүргіншілердің жолдан қауіпсіз, еркін өтуі үшін мамандар 12 жер үсті жаяу жүргіншілер өткелін салады.
