Алматы облысында 1 қыркүйектен бастап халықты алғашқы медициналық-санитариялық көмек (АМСК) ұйымдарына тіркеу бойынша жыл сайынғы науқан басталды. Бұл туралы Алматы облысының Өңірлік коммуникациялар қызметінде өткен баспасөз мәслихатында облыстық денсаулық сақтау басқармасы басшысының орынбасары Лейла Серікбаева мәлімдеді.
«Алғашқы медициналық-санитариялық көмек – бұл кез келген азамат үшін медициналық көмектің бастапқы сатысы.Дәрігерге жүгінетін, алдын алу тексерулерінен өтетін және дер кезінде ем алатын орын. Әр тұрғын өзі үшін ыңғайлы әрі қолжетімді емхананы таңдауы маңызды», – деді Лейла Серікбаева.
2025 жылғы тіркеу науқаны 1 қыркүйектен 1 қарашаға дейін жалғасады. Осы аралықта азаматтар тіркелген медициналық ұйымдарын өзгерте алады немесе алғаш рет тіркелуге өтініш бере алады. Жаңа емханаға тіркелген тұрғындар медициналық көмекті 2026 жылғы 1 қаңтардан бастап ала бастайды. Алайда емхананың Міндетті әлеуметтік медициналық сақтандыру қоры (МӘМС) арқылы қызмет көрсететін мекемелер тізімінде болуы маңызды.
Тіркеу үш түрлі жолмен жүргізіледі:
1. Электронды үкімет порталы (eGov.kz) арқылы;
2. eGov Mobile қосымшасы арқылы;
3. Таңдалған емхананың тіркеу бөліміне барып, жеке куәлікпен.
Жаңа емханаға тіркелу кезінде бұрынғы тіркеу автоматты түрде жойылады. Егер азамат емханасын өзгерткісі келмесе, қайта өтініш берудің қажеті жоқ.
Сарапшылар отбасындағы барлық мүшелердің бір учаскелік дәрігерге тіркелуін ұсынады. Бұл – медициналық көмекті жүйелі түрде алу мен денсаулықты бақылауға оң әсер етеді. Сонымен қатар, тіркелетін емхананың тұрғылықты мекенжайға жақын орналасқаны жөн. Бұл жағдайда дәрігердің қажет кезде үйге келуі жеңілдейді.
«Дұрыс емхананы таңдау – тек сапалы қызмет алу ғана емес. Бұл – өз денсаулығына деген жауапкершілік. Медициналық ұйымды дұрыс таңдаған азамат аурудың алдын алып, емделу процесін жеңілдете алады. Сондықтан облыс тұрғындарын тіркеу науқанынан шет қалмай, өз таңдауларын уақытылы жасауға шақырамыз», – деді Лейла Серікбаева.
Айта кетейік, Алматы облысында бүгінде 800-ге жуық медициналық ұйым жұмыс істейді. Соңғы жылдары шалғай елді мекендерде жаңа нысандар ашылып, медициналық көмектің сапасы мен қолжетімділігі артып келеді. Емханалар заманауи құрал-жабдықтармен қамтылып, мобильді медициналық кешендер ауылдық аймақтарға қызмет көрсетуде.
