Отбасы күніне орай Қарасай ауданындағы «Анаға құрмет» музейінде «Отбасы – бақыт мекені» атты іс-шара өтті. Музей меңгерушісі Гүлнар Әбіш ұйымдастырған кешке Райымбек ауылдық округі ардагерлер ұйымының мүшелері арнайы шақырылды.
Отбасылық құндылықтарды, мәдени мұраны және ұрпақтар арасындағы сабақтастықты нығайтуға бағытталған шараның басты мақсаты – ұмыт болып бара жатқан ұлттық салт-дәстүр мен әдет-ғұрыптардың жандануына атсалысу.
Іс-шара барысында қазақ халқының байырғы заманнан келе жатқан дәстүрлерінің бірі – «Бесікке салу» рәсімі көрсетілді. Бұл ретте нәрестені бесікке бөлеу жолын Райымбек ауылдық округінің асыл аналары, өз бақыттарын еңбектен тапқан ардагер-ұстаздар, «Ана жүрегі» медалінің иегерлері Жібек Әділханова мен Құралай Әуелғазина ұсынды.
Ақсақалдар батасын беріп, әжелер сәбиді бесікке бөлегеннен кейін «Дариға-ай, дәурен» ардагерлер ансамблінің көркемдік жетекшісі Балапан Нағыманова өзінің нәзік дауысымен бесік жырын нақышына келтіріп орындады. Иә, бесік дегеніміз – ғасырлар бойы ұлттың ұясы, тәлім-тәрбиенің қайнар көзі болған құндылықтардың бірі.
Кеш соңында музей меңгерушісі Гүлнар Әбішке іс-шара өте жоғары деңгейде өткенін айтып, ризашылығымызды білдірдік. Жүздеріңіз күндей күлімдеп, жүректеріңіз жаздай жайнасын, жандарыңыз шаттыққа кенелсін демекпін.
Леміс ӘБДІКЕРІМОВ,
Райымбек ауылдық округі ардагерлер ұйымының төрағасы,
Қарасай ауданы
