Әне-міне дегенше, жаймашуақ жаз да өтіп, қоңыр салқын күз де келіп жетті. Жаздың әр күнін тиімді пайдалану мал шаруашылығымен айналысатын жандар үшін өте маңызды. Мұны ескерген балқаштық шаруалар ала жаздай тыным таппастан шөп орды. Бұл жауапты науқанның қалай жүзеге асып жатқанын білу мақсатында Балқаш аудандық ауыл шаруашылығы бөлімінің басшысы Бүркіт Мұқановпен бірге «Өтес-Ақдала» жауапкершілігі шектеулі серіктестігінің №1 бөлімшесіне арнайы барып, ол жердегі қызу еңбекті көзбен көрдік.
Біз атбасын бұрған шаруашылық қысқы мал азығын дайындау жұмысын жүйелі атқарып, өздеріне тиесілі 429 гектар суармалы жерге егілген жоңышқалықтың екінші орылымын ойдағыдай аяқтап, үшінші орылымға шалғы салып жатыр екен.
Аталмыш шаруашылықтың бөлімше басшысы Марат Дүйсенов пен механизатор Жанат Жолдасұлының атқаратын жұмысы шаш-етектен болса да бір сәтке тізгін тартып, үшінші рет орылатын шүйгін шөптің құнары және науқанға ала жаздай жұмылдырылған техникалар мен оларға қанша жанар-жағар май жұмсалғаны, егіс алқапта демалыссыз еңбек еткен жұмыскерлердің жағдайы жайында айтып берді.
Мұнан соң Марат Жолдасұлы 386 гектар жерге егілген күріш алқабын аралатып көрсетті. Диқаншының айтуынша, биылғы жаз айларындағы аптап ыстық күріш дақылының жақсы өсіп-жетілуіне оң ықпалын тигізген. Ақ күмістен сапалы өнім алу үшін қажетті тыңайтқыштар да қолданылған.
Бір айта кетерлігі, Марат Дүйсенов қысқы мал азығын дайындау жұмысын тұрақты кәсіпке айналдырған. Өйткені ол өз қаражатына шөп шабуға арналған бір «Германка» комбайнын және бір шөп бастырғыш, екі «МТЗ-80» тракторын сатып алған. Шөп тиегіш құрылғы орнатылған «МТЗ-80» тракторын өзі тізгіндеп, барлық жұмысты механизаторлармен бірге атқарып жүр.
Жастайынан егіс алқабында тер төгіп, адал табыс тауып жүрген ағайынды Жанат пен Марат Дүйсеновтер – нағыз еңбек иелері. Олар әке жолын жалғастырып жүрген Ақдала ауылының беткеұстар азаматтары. Күн-түн демей, еңбектің қара қазанында қайнаған жандар өзгелерге ісімен үлгі.
Бақтығали ДӘУІТБАЕВ
Балқаш ауданы
