Елімізде Мемлекет басшысының тапсырмасына сәйкес қолға алынған мұғалімдер мен оқушылардың қаржылық сауаттылығын арттыруға бағытталған ауқымды жоба өз жалғасын табуда. Бұл – тек білім беру емес, тұтас ұлттың қаржылық мәдениетін қалыптастыруға арналған маңызды бастама.
Жоба аясында дайындалған оқу бағдарламасы – қаржы және білім саласындағы халықаралық сарапшылардың ұсыныстары негізінде жасалған тың дүние. Мұндағы басты мақсат – заманауи қаржы әлемін түсінетін, өзінің және отбасының қаржысын сауатты басқара алатын жаңа буын қалыптастыру.
Бес күндік курста «Өрлеу» біліктілікті арттыру ұлттық орталығының тәжірибелі тренерлері педагогтерге қаржыны тиімді басқарудың негізгі қағидаларын үйретіп жатыр. Курс барысында тыңдаушылар қаржылық мінез-құлық психологиясын, отбасылық бюджетті жоспарлау тәсілдерін, инфляцияның жеке қаржыға әсерін, инвестиция және цифрлық активтер туралы мағлұматтарды, несие мен зейнетақы жүйесінің қыр-сырын меңгереді. Сонымен қатар қаржы пирамидалары мен интернет-алаяқтықтың түрлерін ажырату, жеке деректерді қорғау сынды заманауи қауіпсіздік мәселелері де назардан тыс қалмайды. Бұл бағыттағы дәрістерге Ұлттық банк мамандары да арнайы қатысып, нақты мысалдар келтіріп, дәріс беруде.
Апталық курсты аяқтаған соң, еліміздің барлық өңірінен жиналған «Жаһандық құзыреттілік» пәнін оқытатын 500-ге жуық мұғалім оқушыларға қаржылық сауаттылық бойынша дәріс беруді бастайды. Жыл соңына дейін бұл көрсеткіш 6 мың педагогке, ал 2026 жылы 4 мыңға жуық мұғалімге дейін жетпек.
Айта кетейік, бұл игі бастама «Өрлеу» біліктілікті арттыру ұлттық орталығы» АҚ «Алматы облысы бойынша кәсіби дамыту институты» филиалында да ресми түрде басталды. Мұнда алғашқы педагогтер тобы дәрістерді тыңдап, тәжірибелік сабақтарға белсене қатысуда.
Қаржылық сауаттылықты мектеп бағдарламасына енгізу – ел болашағына салынған инвестиция. Бұл – әрбір азаматтың қаржы әлемінде адаспай, дұрыс шешім қабылдай алуына жол ашатын, экономикалық тұрақтылықты қамтамасыз ететін маңызды қадам. Сонымен қатар бұл бастама қоғамды қаржы алаяқтарынан, жалған уәделерге құрылған пирамидалардан қорғаудың да тиімді жолы болып отыр.
Қарлығаш БЕСІРОВА,
«Өрлеу» БАҰО» АҚ
«Алматы облысы бойынша кәсіби даму институты» филиалының редакциялық-баспа қызметі бойынша
жетекші маманы