Облыс әкімі Марат Сұлтанғазиев Алатау қаласы аумағында өртеніп жатқан тұрмыстық қатты қалдықтар полигонына барды. Оның аумағын аралап, арнайы құрылған жедел штабтың жұмысымен танысты.
Аймақ басшысына нақты жағдайды баяндаған облыстық төтенше жағдайлар департаменті өкілдері тілсіз жаумен күреске Алматы қаласы мен өзге де облыстардан құтқарушылар мен арнайы техника тартылғанын айтты. Бұған қоса ҚР Төтенше жағдайлар министрлігінің әскери бөлімдері де жұмылдырылған. Бүгінде 275 маман мен 120-дан аса техника тәулік бойы жұмыс істеп жатыр. Өртті сөндіру үшін 6 учаске құрылып, Тереңқара өзенінен су жеткізетін магистральдық желі тартылған.
«Өртті сөндіру бойынша барлық қажетті шара қабылдануда. Күндіз-түні құтқарушылар ошақтарды керекті материалдармен толтырып, топырақты тығыздап жатыр. Бұл әдіс оттың бықсып жануына әсер ететін оттегіні толығымен бітеп, өрттің түпкілікті жойылуын қамтамасыз етуге мүмкіндік береді. Мұндай өртті сөндіру өте қиын, себебі полигонда оттегіге қол жеткізу мүмкін емес. Қоқыс қабаттары терең әрі тығыз болғандықтан, өрт көзін анықтауда кейбір қиындықтарға тап болып отырмыз. Сонымен қоса жел күші де кедергі. Соған қарамастан, қызыл жалын түгел дерліктей сөндірілді. Маңайдағы елдімекендерге ешқандай қауіп төніп тұрған жоқ», – деді полковник Дәурен Оразбеков.
Қазір Алатау қаласы әкімдігі тарапынан өрт сөндірушілерді тамақтандыру және уақытша орналастыру үшін 130 адамға арналған шатырлар тігілген. Сонымен қоса жұмысқа жұмылдырылған техникалар жеткілікті жанар-жағармаймен қамтамасыз етілген. Өз кезегінде облыс басшысы төтенше жағдайлар қызметкерлері мен жергілікті әкімдік өкілдеріне тәулік бойы кезекшілік ұйымдастырып, жел бағытының өзгерісін тұрақты бақылауда ұстау мен техникалардың бар мүмкіндігін толық пайдалануды тапсырды. Сонымен қоса халықты өртті сөндіру барысы мен қауіпсіздік шаралары туралы ашық әрі тұрақты түрде ақпараттандыруды міндеттеді.
Еске сала кетсек, Алатау қаласына қарасты Әли ауылының маңындағы қатты тұрмыстық қалдықтар полигоны арнайы келісім арқылы жеке кәсіпкерге сенімгерлікке берілген. Аталған полигон 35 гектар аумақты алып жатыр.
Ерзат АСЫЛ
Алатау қаласы
