Қонаев қалалық кітапханасында 24 қазан – Кітапханашылар күніне орай балалар бөлімі ашылды. Онда балалар әдебиетіндегі озық туындылар топтастырылып, «TikTok» алаңы да қарастырылған. Осы арқылы жас оқырмандарды кітап әлемінің ғажайыптарымен таныстырмақ.
Шараға облыстық әмбебап кітапханасының директоры Ғалия Тоқабаева, Қазақстан Жазушылар одағы Алматы облыстық филиалының төрағасы Ержан Тоқтар, республикалық «Балдырған» журналының бас редакторы Ерғали Бақаш, Қонаев қалалық мәслихатының депутаты Ержан Бүркітбай қатысып, жаңа бөлімнің лентасын қиды.
– Кітапханамыздағы он мың оқырманның 35 пайызы – балалар. Сол себептен оларға ерекше көңіл бөліп, ыңғайлы болу үшін жеке бөлім ашуды жөн көрдік. Модернизациядан кейін қосымша 8 штат берілген болатын. Қазір үш қызметкер балалармен жеке жұмыс істейді. Кітапхана тек кітап алып, қайта өткізетін орын емес. Бүгінде ол заманауи трендтен қалмай, дәуір ағымына ілесіп келеді. «TikTok» алаңы – соның дәлелі. Олар басында бейнеүзінді түсіруге келуі мүмкін. Бірақ мұндағы түрлі-түсті, көздің жауын алатын кітаптарды көріп, міндетті түрде біреуін оқуға алып кетеді. Бөлім ашылмай жатып, дайындық кезінің өзінде балалар қызығып, келіп жатты. Бізде мобильді бағдарламалар арқылы кейіпкерлерге жан бітетін кітаптар бар. Көбі соларды көріп, тамсанып жатты. Бұл жас ұрпақтың болашақта ақыл-білімі терең, ойлау өрісі кең болуына көмектеседі, – деді Айгүл Бегімбайқызы.
«Балдырған» журналының бас редакторы Ерғали Бақаш бала жандүниесінің ерекшелігіне сай бөлімнің маңыздылығына тоқталып, жеткіншектерді кітап, газет-журнал оқуға тәрбиелеу керектігін тілге тиек етті. «Біз балаға кітап оқы деп қанша үгіттегенімізбен, өзі қызықпаса ол да көмектеспейді. Сол үшін олармен бірге оқиғаны талдап, қызық тұстарын әңгіме етіп, балалар әлеміне енуіміз керек. Кірпіштей қалың кітап бергенмен, бүлдіршінге ол қиындық тудырады. Жас ерекшелігіне сай шығармаларды таңдап, сол арқылы тәрбиелеп, жетелеу керек. Бүгінде балабақша тәрбиешілерінен бүлдіршіндерге жаттататын жібі түзу өлең жоқ дегенді жиі естимін. Бірақ балаларға арналған басылымдар көп. Онда жұмбақ, санамақ, ертегі, әңгіме мен мақалалардың түр-түрі жарияланып жатады. Соны оқып, дағдыланып, болашақта қаламгер болып шығуы да мүмкін. Сондықтан кітапхана ішінде балаларға арнайы бөлімнің ашылғаны қуантады, – деді ол.
Кітапхананың тұрақты оқырманы Іңкәр Болат жаңа бөлімнің кең әрі кітап оқып, үй жұмысын орындауға ыңғайлы екенін жеткізді, мұндай жағдай жасаған ұйымдастырушыларға алғысын айтты. Сондай-ақ «Гүлдер» балабақшасының тәрбиеленушілері мен «Асыл» өнер мектебінің өнерпаздары ән мен күйдің әсем әуенімен шараның шырайын аша түсті.
Гүлзат БАЙҚОНЫСОВА
Қонаев қаласы
