Жазушы, қоғам қайраткері Бақтығали Айжігітовтің бастамасымен Талғар қаласындағы №25 мектеп-гимназиясында «Кемелтанушылар клубы» ашылғанына көп уақыт бола қойған жоқ. Соған қарамастан, клуб мүшелері жас ұрпақты отаншылдық рухында тәрбиелеу бағытында жиі-жиі тартымды да тағылымды іс-шаралар ұйымдастырып келеді.
Аудандық Мәдениет үйінде өткен осындай шаралардың бірі «Батырлар мәңгі ұмытылмайды» деп аталды. Ол ІІ Дүниежүзілік соғыста Рейхстагқа алғаш болып Жеңіс туын тіккен Қазақстанның Халық қаһарманы Рақымжан Қошқарбаевтың туғанына 101 жыл және отандық детектив жанрының атасы, көркемсөз шебері, соғыс ардагері Кемел Тоқаевтың туғанына 102 жыл толуына арналды.
Шара LED-экранда Рақымжан Қошқарбаев пен Григорий Булатов көрсетіліп, мектеп оқушылары олардың Жеңіс Туын тігер алдындағы әңгімесін сахналаған бейнекөріністен басталды. Қардай бораған жау оғына қарамастан, Булатов төменде, Қошқарбаев Рейхстагтың үстіне шығып, Жеңіс Туын тігеді. Осы көріністің өзі зал лық толған оқушыларды бейжай қалдырмағаны сөзсіз.
Әрі қарай әйгілі «Жеңіс күні» әні орындалды. Жүргізуші Мемлекет басшысы Қасым-Жомарт Тоқаевтың «Әке туралы ойын» оқып, оркестр «Әке толғауы» күйін орындады. Бұл да тыңдаған жанның рухын көтеріп, саналыға ой салатын сезімтал сәт болды.
«Кемелтанушылар клубы» тек өз елімізде ғана емес, атақты жазушы мен Халық қаһарманы әскери училищеде оқыған Бішкек қаласында, қазақстандық жауынгерлер ерліктің өшпес үлгісін көрсеткен Ресейдің бірнеше өңірінде де отандастарымыздың ерлігін дәріптеп, ел есінде қалдыру мақсатында үлкенді-кішілі шаралар ұйымдастырып жатқанын айта кеткен орынды. Сондай игі істердің бірі – қыркүйек айында Бішкек қаласындағы №33 мектеп-гимназиясында өткен үлкен көрме. Оған екі елдің зиялы қауым өкілдері, қоғам белсенділері, мемлекет қайраткерлері, ұстаздар мен оқушылар қатысты. Бұған дейін Бақтығали Айжігітов ағамыз осы мектепке Кемел Тоқаев немесе Рақымжан Қошқарбаевтың есімін беру туралы үш рет хат жолдаған болатын. Қырғыз билігі қоғам қайраткерінің ұсынысын қабыл алып, Жеңістің 80 жылдығы тұсында мектепке Кемел Тоқаевтың есімі берілді. Бұл – екі туысқан ел арасындағы достық қарым-қатынас пен бауырмалдықты одан әрі нығайтатыны сөзсіз.
Естеріңізге сала кетейік, отандық детектив жанрының атасы саналатын көркемсөз шебері, соғыс ардагері І және ІІ дәрежелі Ұлы Отан соғысы ордендері, екі мәрте «Ерлігі үшін» және басқа да көптеген медальдардың иегері Кемел Тоқаев 1923 жылы 2 қазанда дүниеге келсе, Рейхстагқа Жеңіс Туын алғаш болып тіккен Қазақстанның Халық қаһарманы Рақымжан Қошқарбаев 1924 жылы 19 қазанда туған.
Шараның мақсаты – аталарымыздың өшпес ерлігін өскелең ұрпаққа үлгі етіп, оларды елін, жерін сүйетін, әрқашан Отанын қорғауға дайын тұратын патриоттық рухта тәрбиелеу. Кеш барысында қос батырдың ерлігін айғақтайтын құжаттар және Кемел Тоқаевтың шығармалары қойылған көрме ұйымдастырылды. «Кемелтанушылар клубының» мүшелері ән-жыр орындап, жиналған көпшілікті батырлар даңқына лайық болуға үндеді. Сондай-ақ Қырғызстанның еңбек сіңірген әншісі, композитор, айтыскер ақын Ақмөлдір Орманбекова «Кемел аға» әнін әуелете шырқады.
Шара соңында «Ер Намыс» қоғамдық бірлестігінің төрағасы, «Алаш прайд» спорт қоғамының құрметті ардагері, профессор Ерболат Алиядин және аудандық мәслихат төрағасы Мұхит Әлібековтің атынан Талғар ауданының Құрметті азаматы, қоғамдық кеңес мүшесі Құндыз Хасанова бірнеше жылдан бері жас ұрпақ үшін тәрбиелік мәні зор патриоттық іс-шараларға белсене қатысып, өз үлестерін қосып келе жатқан бірқатар қоғам белсендісін, ұстаздар мен оқушыларды және «Кемелтанушылар клубының» мүшелерін марапаттады.
Құтмағамбет ҚОНЫСБАЙ
Талғар ауданы
