Даналығы мен өмірде жиған тәжірибесін өскелең ұрпаққа өсиет етіп, ақылын айтып отыратын қарияларымыздың қашанда орны бөлек. Осынау асыл жандарға құрмет көрсету мақсатында Халықаралық қарттар күніне орай «Қарты бар елдің қазынасы бар» атты мерекелік шара өтіп, ақ дастарқан жайылды.
Шара барысында сөз алған Кеген ауданының әкімі Нұрбақыт Теңізбаев қазыналы қарттарға ізгі тілегін жеткізді.
– Сіздер еліміздің дамуы, ауданымыздың көркеюі жолында үлкен еңбек еттіңіздер. Қазір де қоғамдық істерге араласып, жастарға бағыт-бағдар беріп отырсыздар. Сол үшін сіздерге зор алғыс айтамыз, – деді.
Аудандық мәслихат төрағасы Алмасбек Нұғыман да ақ тілегін ортаға салды.
– Сіздердің берген баталарыңызбен еліміз, жеріміз көгереді. Көрсеткен сара жолдарыңыз бен бастамаларыңызды жалғастыратын білімді де, ізденімпаз салауатты өмір салтын насихаттайтын ұрпақ көбейе берсін! Әркез аман болыңыздар! – деді ол.
Шара барысында Кеген аудандық ардагерлер кеңесінің төрағасы Сабыр Досымбеков, ақсақалдар алқасының төрағасы Көпжасар Нұрлыбай, Кеген ауданының Құрметті азаматы Нағима Таласбаева, Болат Таубалдиев сөз сөйлеп, ақ жаулақты әжелер мен ақ сақалды қарияларға көрсетілген сый-құрметке өз ризашылықтарын білдірді.
Кеш аясында «Қарттарым, аман-сау жүрші», «Әке» әндері орындалып, «Адай» күйі күмбірледі. Аудандық жұмыспен қамту және әлеуметтік бағдарламалар бөлімі қызметкерлерінің орындауындағы «Менің қос бәйтерегім» әні мерекенің шырайын аша түсті. Аудан өнерпаздары да арнайы концерттік бағдарламасын дайындап, кештің сәнін келтіріп, көрерменге көтеріңкі көңіл-күй сыйлады.
Шара соңында аудан әкімі Нұрбақыт Молдахметұлы ардагерлерге сый-сияпат табыстап, естелік суретке түсті. Қарттар өз өнерлерін көрсетіп, мерекенің мазмұнын байыта түсті.
Дәурен ӘБУТӘЛІПОВ
Кеген ауданы
