Райымбек аудандық жұмыспен қамту және әлеуметтік бағдарламалар бөлімі өңірдегі әлеуметтік осал топтарға жататын азаматтарға мемлекеттік бағдарлама аясында қолдау көрсетіп, қамқорлық жасауды тұрақты жолға қойған. Осынау құзырлы орын тарапынан қамқорлықтың игілігін көрген жандар шарапаты мол шараларға әрдайым ризашылығын білдіріп, алғыс айтады.
Әлеуметтік сала қызметкерлері Қарттар күніне орай жүректі жылытып, көңілді көркейтетін тағы бір сауабы мол іске мұрындық болды. Атап айтқанда, әр ауылдағы жалғызбасты қарттардың басын қосты. Аудан орталығындағы «Хафиза» атты мейрамханаға берекелі дастарқан жайып, мерекелік дәм ұсынды.
Райымбек ауданының әкімі Дастан Құдабаев көпті көрген, өмірдің ыстық-суығына төзген, ұрпақтың бақыты үшін отқа да, суға да түсетін, заманның тыныштығы мен елдің береке-бірлігін тілеуден жалықпайтын қазыналы қарттарға өзінің ыстық ықыласын арнады. Әрбір отбасының, бір-бір ауылдың қорымалы саналатын қариялардың жүріп өткен өмір жолы бүгінгі ұрпақ үшін өнеге, қоғам үшін тәлім-тәрбиенің қайнар көзі екенін тілге тиек етті. Қазыналы қарттардың орны қашанда бағалы екенін айтып, көңілдерін кір, жүректерін мұң шалмауын, денсаулықтарының зор, өмірлерінің ұзақ болып, бай-қуатты ғұмыр кешулерін тіледі. Қарттарға деген қамқорлық аясы кеңейе беретінін жеткізді.
Келесі кезекте сөз алған Райымбек аудандық мәслихат төрағасы Самат Мүсірбаев, аудандық жұмыспен қамту және әлеуметтік бағдарламалар бөлімінің басшысы Фариза Ысқақова қарияларды айтулы мерекемен құттықтап, шараның мән-маңызына қысқаша тоқталды. Асыл жандарға ақ тілектерін арнады.
Мерекелік дастарқан басында Сапарбай, Жеңіс, Шәріпақын сияқты ақсақалдар, Сара, Бүбина секілді ақ самайлы аналар сөз ұстап, ізгі тілек-ниеттерін білдірді. Өздеріне осындай сый-құрмет көрсетіп отырған аудан әкімдігіне, әлеуметтік сала қызметкерлеріне алғыстарын айтып, батасын берді. Гүлзира, Бота, Ербақ, Дархан, Уәлихан сияқты аудандық Мәдениет үйінің күміскөмей, жезтаңдай әншілері әуелете ән салып, қариялардың көңіл-күйін еселеді.
Мерекелі де берекелі дастарқан үстінде қарттарға аудан әкімдігі мен әлеуметтік бағдарламалар бөлімі тарапынан арнайы сыйлықтар тарту етілді.
Жұмабек ТҰРДИЕВ
Райымбек ауданы
