Райымбек ауданының ауылдық округтерінде біраздан бері қолға алынған «Қазына тұнған құт мекен» атты мәдени-көпшілік шара өлкенің тарихын, біртуар перзенттерін, салт-дәстүр, әдет-ғұрпын, ұрпақтар сабақтастығын насихаттауға арналған.
Игі шара Қарасаз ауылында жарасымды жалғасын тапты. Мәдениет үйінде ауыл өнерпаздары мен жастары, ұстаздар, ақсақалдар, аналар кеңесі бірлесе ұйымдастырған тағылымды кеш Еркін Ібітановтың мұрасына арналды. Жиналған көпшілік кең залға қойылған көнеден бүгінге жалғасқан ұлттық қолөнер бұйымдары көрмесін тамашалады. Ақын кітаптарын парақтап, қаламгердің өмір жолы мен шығармашылығынан сыр шертетін фотосуреттерге назар аударды.
Ақынға арналған шара бұдан кейін кең көлемді концертке ұласты. Сахна төрінде мектеп оқушылары Еркін Ібітановтың өлеңдерін мәнерлеп оқып, жырсүйер қауымға тарту етті. Мәдениет үйі жанынан құрылған «Ақ әжелер» ансамблі орындаған «Ой, көк», «Сәулем-ай!» халық әндері, Оразқан Айтпанбетов ақсақал айтқан Біржан салдың «Теміртасы», Тұрсынбүбі Өткелбаевадай ақ жаулықты ана шырқаған Ескендір Хасанғалиевтің «Ауылым – әнім», Дарқан Қырықбаев, Арман Қожабергендер әуелеткен әсем сазды әуендер тыңдарманның құлақ құрышын қандырды. Зарина Оспанова жетекшілік ететін «Талант» би тобының орындауындағы «Қазақ биі» де көрерменнің көзайымына айналды.
Қарасаз ауылында өткен «Қазына тұнған құт мекен» атты мәдени-көпшілік шара ауыл тұрғындарының мерейін өсірді.
Жұмабек ТҰРДИЕВ
Райымбек ауданы
