Құрметті Алатау қаласының тұрғындары!
Сіздерді елдік пен егемендіктің айшықты мерекесі – 25 қазан – Республика күнімен шын жүректен құттықтаймын!
Бұл мерекенің мемлекетіміз үшін тарихи әрі рухани мәні ерекше.
Мемлекет басшысы Қасым-Жомарт Кемелұлы Тоқаев Ұлытау жерінде өткен Ұлттық құрылтайда:
«Республика күні елдің мемлекет құру жолындағы тарихи қадамының символы болуы керек. Қазанның 25-ін жыл сайын еліміздің басты мерекесі ретінде атап өтуіміз қажет» – деп, Республика күніне ұлттық мереке мәртебесін қайтаруды ұсынған болатын.
Президентіміздің бұл саяси шешімі – егемендіктің бастауы болған Декларацияның тарихи маңызын айқындай түсті. Бұл қадам халқымыздың тәуелсіздік жолындағы еңсесін биіктетіп, елдігіміздің тұғырын бекемдей түсті.
Республика күні – тарихи тағылымы терең, идеологиялық мәні зор мереке. Бұл күн – ел тағдырына бейжай қарамайтын әрбір азаматтың отаншылдық рухын оятып, сенім мен жауапкершілік сезімін арттырады.
Тәуелсіздік жылдары еліміз талай белестерді бағындырып, жаңа даму кезеңіне қадам басты. Мемлекетіміздің әлеуметтік-экономикалық және мәдени өрлеуі әр өңірден көрініс табуда.
Сол игі істердің бірі – Алматы облысында жаңа қала – Алатау қаласының құрылуы.
Бұл бастама – еліміздің даму бағытын айқындайтын, өңірлердің әлеуетін арттыруға бағытталған тарихи шешім.
Бүгінде Алатау қаласында тұрғындардың өмір сапасын арттыру, әлеуметтік нысандарды көбейту, жаңа жұмыс орындарын ашу бағытында нақты жұмыстар атқарылуда. Барлық бастамалар мен жобалардың түпкі мақсаты – халықтың әл-ауқатын жақсарту және жаңа қаланың болашағын жарқын ету.
Құрметті жерлестер!
Республика күні – өткенге тағзым етіп, болашаққа сеніммен қарауға шақыратын мереке.
Осы айтулы күні баршаңызға зор денсаулық, отбасылық амандық, еңбектеріңізге табыс пен береке тілеймін!
Еліміздің еңсесі биік, мемлекетіміздің мерейі үстем болсын!
Ізгі тілекпен,
Аркен Хамитұлы,
Алатау қаласының әкімі
