25 қазан – барша қазақстандықтар үшін айрықша тарихи күн. Бұл күн – біздің мемлекетіміздің егемен ел болуға деген нық қадамын білдіретін Республика күні. 1990 жылы дәл осы күні қабылданған Қазақстан Республикасының мемлекеттік егемендігі туралы Декларация елдің тәуелсіздікке апарар дара жолын айқындады.
Республика күні – ел тағдырындағы маңызды белес, ұлттық бірегейлікті, еркіндік пен жаңғыру идеясын бейнелейтін мереке. Бұл күн – халқымыздың елдікке деген жігерін, мемлекеттіліктің маңызын сезіндіретін сәт. Егемендіктің алғашқы қадамы осы күннен бастау алып, тәуелсіздік рухы халқымыздың жүрегінде мәңгі орнықты.
Бүгінгі таңда Қазақстан әлемге өз орнын айқындаған, бейбітшілік пен келісімді ту еткен мемлекетке айналды. Әділетті қоғам орнату жолында қолға алынған реформалар ел дамуының жаңа кезеңін айқындап отыр. Бұл – сол тарихи Декларацияның, сол кездегі батыл шешімнің жалғасы.
Республика күнін атап өту – өткенге тағзым етіп, болашаққа сеніммен қарау. Бұл мереке әрбір азаматқа елінің бүгіні мен ертеңіне жауапкершілікпен қарауды еске салады. Себебі Республика – халықтың таңдауы, елдің еркі, ұлттың бірлігінің айғағы.
Біздің парызымыз – осы құндылықтарды сақтап, келер ұрпаққа аман жеткізу. Әрбір қазақстандықтың жүрегінде отансүйгіштік рухы, елге деген сүйіспеншілік оты сөнбеуі тиіс.
Республика күні құтты болсын!
Еліміз аман, тәуелсіздігіміз тұғырлы болсын!
Нұрхайын Мұхиддинов,
Алатау қаласының қоғамдық пікір көшбасшысы
