Кегенде өткен марафон тұрғындарды салауатты өмір салтын ұстануға шақырып қана қоймай, қоғамдағы бірлік пен ынтымақтың айқын көрінісіне айналды. «Жастар кеңістігі» ұйымы мен Кеген ауданының әкімдігі ұйымдастырған спорттық шараға тұрғындар белсене қатысты.
Жарыс Кегендегі орталық алаңнан басталып, ауылдың кіреберіс қақпасына дейін созылды. Аудан басшысы Нұрбақыт Теңізбаев қатысушыларға сәттілік тіледі. Марафонға 65 жастағы Жаңылхан апамыз да қатысып, спортқа деген ерекше ынтасы мен қайсарлығын көрсетті.
«Жастардың әр бастаған ісіне дем беріп, жанашыр болып жүрген аудан әкімі Нұрбақыт Молдахметұлына, сондай-ақ бізге жан-жақты қолдау көрсеткен Кеген ауылының әкімі Ернат Ысқаққа алғыс білдіремін», – деген «Жастар кеңістігі» ұйымының жетекшісі Аслан Мейірғалиұлы алдағы уақытта да мұндай спорттық шаралар жалғаса беретінін жеткізді.
Жарыс нәтижесі бойынша 5 шақырымдық жарыста қыздар арасында ІІІ орынды Лашын Ринатқызы, ІІ орынды Назым Сәрсенбиева иеленсе, Роза Құрманбаева жүлделі І орын алып, марафон жеңімпазы атанды. Ерлер арасында 10 шақырымдық қашықтыққа жүгіруден ІІІ орынды Нұржігіт Тілеубай, ІІ орынды Елікбай Әділет және жүлделі І орынды ауданның желаяғы Айбар Бақытұлы еншіледі. Ал 35 жастан асқан ерлер бақ сынаған 5 шақырымдық сайыста ІІІ орынды Жотабай Мақсат, ІІ орынды Олжас Сәлімханов иеленсе, Мақсат Базарымбетов І орынға шықты. Жеңімпаздар арнайы диплом, медаль және ақшалай сыйлықтармен марапатталды. Белсенділік танытқан барлық қатысушыға «Жастар кеңістігі» атынан марафон медалі табысталды.
Аталған спорттық шара аудан жастарының бірлігін, спортқа деген қызығушылығын арттырғаны анық. Марафон барысында мектеп оқушылары волонтерлік қызмет атқарды. Жастарды қоғамдық ортаға тарта отырып, болашақ ауыл жанашырларын тәрбиелеуде осындай игі шаралардың атқаратын рөлі зор.
Бұл күні қосымша ойындар мен концерттік бағдарламалар да ұйымдастырылып, тұрғындар мерекелік көңіл-күйге бөленді.
Дәурен ӘБУТӘЛІПОВ
Кеген ауданы
