Жұмысшы мамандықтары жылына орай облыстық жастар ресурстық орталығы шағын футболдан жұмысшы жастар арасында облыстық турнир ұйымдастырды.
«Sport-Time» жобасы аясында өткен жарысқа аудандық және қалалық кезеңнен оза шапқан командалар қатысты. Олардың қатарында Жамбыл, Талғар, Балқаш, Еңбекшіқазақ және Кеген ауданының жұмысшы жастары бар.
«Біз Кеген өңірінен келдік. Осыған дейін іріктеу кезеңінде тартысты ойын көрсеттік. Бұл жолғы бәсеке мүлдем ерекше. Әр аудан, қаладан кіл мықтылар жиналыпты. Аталған турнир облыстың түкпір-түкпірінен келген жастардың басын қосып, бірлігін нығайтуға, спортқа құлшынысты арттыруға сеп болды. Жұмысшы мамандық иелеріне баса мән берілгені қуантады», – дейді жарысқа қатысушы Руслан Айтжанов.
Ойын қызу өтті. Әр команда барын салып, жарыс алаңында шеберлігін байқатты. Футбол қорытындысына сәйкес, I орынға «Кеген жастары» командасы жайғасты. II орын Балқаш ауданының «Бақбақты» командасына бұйырса, III орынды «Еңбекшіқазақ» футболшылары місе тұтты. Жүлдегерлерге қаржылай сыйлық табысталды. Сонымен қатар жарыста бақ сынаған өзге командаларға да ынталандыру сыйлығы берілді.
«Sport-Time» – жұмысшы мамандардың беделін арттырып, жастарды спорт пен салауатты өмірге шабыттандыратын маңызды жоба. «Іс-шараның басты мақсаты – жұмысшы жастар арасында достық қарым-қатынасты арттырып, олардың бос уақытын тиімді пайдалануына себепші болу, салауатты өмір салтын насихаттау және спортпен жүйелі түрде шұғылдануға ықпал ету», – деді облыстық жастар ресурстық орталығы ұйымдастыру бөлімінің басшысы Шыңғыс Мұқашев.
Өз тілшіміз
Қонаев қаласы
