«Мың бала» республикалық мәдени-ағартушылық жобасы Қазақстан халқы Ассамблеясы бастамасымен 2015 жылдан бері жүзеге асырылып келеді. Бұл байқау өскелең ұрпақты, атап айтқанда, еліміздегі түрлі этнос өкілдерін мемлекеттік тілді үйренуге ынталандыру арқылы қазақстандық бірегейлікті дамытуға бағытталған. Талғар қаласындағы Абай атындағы №3 орта мектепте аталған конкурстың өңірлік кезеңі өтті. Ол әйгілі композитор, дәулескер күйші, даңқты дирижер Нұрғиса Тілендиевтің 100 жылдығына арналды.
Мектептің мәжіліс залында әр ауданнан келген жас өнерпаздар ұлттық аспаптарда Нұрғиса Тілендиевтің туындыларын орындады. Олардың өнерін облыстық ҚХА төрағасының орынбасары, «Ронай» күрд этномәдени орталығының төрағасы Гамзе Гейдаров, Талғар аудандық мәдениет бөлімінің өкілі Ділда Әбілқасымова, «Қоғамдық келісім және даму орталығы» мемлекеттік мекемесі этномәдени орталықтар жұмысын үйлестіру бөлімінің басшысы Жансұлу Бәшенова қатысқан қазылар алқасы бағалап отырды.
Өнер сайысын ашқан қазылар алқасының төрағасы Гамзе Гейдаров этностар арасында тіл мәдениетін дамытуға елеулі үлес қосқан «Мың бала» байқауының маңыздылығын атап өтті. Ол:
– Жоба өскелең ұрпақты – мектеп жасына дейінгі балалар мен мектеп оқушыларын, сондай-ақ түрлі этнос жастарын Қазақстан халқының ұлттық және рухани құндылықтарына баулуға, мемлекеттік тілді насихаттауға бағытталған. Біз бүгін осындай игі шараға қатысып жатқан өнерлі де талапты балаларды көріп отырғанымызға қуаныштымыз және олардың шығармашылық бастамасына әрдайым қолдау көрсетуге дайынбыз, – деп қатысушыларға сәттілік тіледі.
Сахнаға бірінші болып Қонаев қаласынан келген Любовь Краснобаева «Елге сәлем» әнімен шықты. Іле ауданының намысын қорғаған Вадим Травин Нұрғиса Тілендиевтің «Ата толғауы» күйін асқан шеберлікпен орындады. Ал ақындар мен батырлар елі саналатын Жамбыл ауданының өкілі Алексей Юрченко Қапездің «Үш Меркі» әнін әуелетті. Дәулескер күйшінің «Әлқиссасын» Қарасай ауданының өкілі Валерия Ким, Жамбыл ауданынан Ағмат Ислам Әбдімомын Желдібаевтың «Ерке сылқым» күйін күмбірлетті. Іле ауданынан келген Виктория Коваленко «Балапан қаз» халық әнін шырқап, осы ауданның «Наворис» тобы «Кеңес» күйін тартып, шеберліктерін паш етті. Талғар ауданының намысын қорғаған Лейла Әлиева Абдулхамит Райымбергеновтің «Секіртпе» күйін орындаса, Іле ауданынан келген Арафат Розахунов Нұрғиса Тілендиевтің «Өз елім» әнін шырқады. Жас әртістердің өнері Іле ауданынан келген Анастасия Сундукованың орындауындағы Нұрғиса Тілендиевтің «Ата толғауы» әнімен аяқталды.
Қазылар алқасы байқау қорытындысын шығарды. «Мың бала» аталымында әлеуметтік желілерде Абай Құнанбаевтың өлеңін оқуға арналған үздік челлендж жариялаған Қарасай ауданының 10-сынып оқушысы Туляй Татарова жеңімпаз атанды. «Өнерлі өрге жүзер» аталымында бірінші орынды Жамбыл ауданынан Алексей Юрченко, екінші орынды талғарлық Лейла Әлиева, үшінші орынды Іле ауданынан Виктория Коваленко иеленді. Жүлдегерлерге ақшалай сыйлықтар табысталды.
Байқау шарты бойынша облыстық кезеңнің жеңімпазы Астанада өтетін додаға қатысу құқығына ие болады. Бұл құрмет Алексей Юрченкоға бұйырды. Ол енді республикада облысымыздың намысын қорғайды
Құтмағамбет ҚОНЫСБАЙ
Талғар ауданы
