Белгілі ақын Алтыншаш Жақиянованың «Бәсіре-жыр» атты кітабы ҚР Мәдениет және ақпарат министрлігінің қолдауымен жарық көрді. Онда балаларға арналған өлеңдер мен поэмалар, аудармалар топтастырылған.
Бұл – Алтыншаш Жұманқызының балаларға арналған үшінші кітабы. Жас оқырманның түсінігіне бейімделіп жазылған тәрбиелік мәні зор өлеңдері тілге жеңіл, ойға қонымды. Жинақ «Ақылды болып өсейік», «Аппағым», «Мен – қазақтың ұланымын», «Тал бесік», «Қанатың талмасын», «Аудармалар» және «Бәсіре-жыр» деп аталатын жеті бөлімнен тұрады. Әр бөлімге жүйеленген шығармалар белгілі бір тақырыпқа топтастырылған. Туынды бала жүрегіне жол тауып, ойына ой қосатын, балабақша және бастауыш сыныптағы балаларға арналған таптырмайтын дүние. Маңызды мерекелерге, жыл мезгілдеріне, табиғат көріністері мен әлемді тануға арналған өлеңдері бүлдіршін психологиясына сай жазылған. Балаға деген мейірім-махаббаттан туған жүрек үні де жыр болып төгілген. «Бәсіре-жыр» поэмасында сәбидің дүниеге келген сәтінен бір жасқа толғанға дейінгі кезеңдегі өсіп-жетілуі, жақындарын шаттыққа бөлеген нәрестенің бейнесі суреттеледі. Ал аудармаға арналған бөлімде мажар тілінен тәржімаланған өлеңдері берілген.
Гүлзат БАЙҚОНЫСОВА
