Талғар ауданың орталығындағы Дінмұхамед Қонаев атындағы жастар саябағында Жеңістің 80 жылдығына орай Даңқ аллеясы ашылды. Шараға өңір тұрғындары, зиялы қауым өкілдері, бауырлас Қырғыз елінен келген қонақтар қатысты.
Аллеяны ашу идеясы соғыс ардагері, жазушы Кемел Тоқаевтың, сондай-ақ Тверь облысы Ржев ауданы Трубино ауылының бауырластар зиратында жерленген қазақ және қырғыз сарбаздарының өмірі мен қызметін зерттеген Бақтығали Айжігітов пен Сәуле Нағмановаға тиесілі. Олар 1941-42 жылдары Фрунзе қаласындағы №33 мектеп базасында жаңадан құрылған жаяу әскер училищесінде оқыған қазақстандық соғыс ардагерлері Рақымжан Қошқарбаев, Кемел Тоқаев және қырғыз жауынгерлері – Кеңес одағының батыры Василий Петрищев, Сәмибек Егимбердиев, Анатолий Писаренко, Сергей Извековтің есімдерін мәңгі есте қалдыру бойынша белсенді жұмыс жүргізді. Сол жерде жауынгерлік даңқ мұражайын ашуға тікелей ықпал етті. Ерлі-зайыптылар Мәскеу облысының Тула қаласында бауырластар зиратын аралап, қаза тапқан есімі белгісіз батырларға құрмет көрсетіп, олардың рухына ас берді. Ал Тверь облысының Трубино ауылындағы бауырластар зиратынан бір уыс қасиетті топырақты Қазақстан жеріне алып келді.
Бұл қатарда Қырғыз жауынгері Дүйсенқұл Шопековтің Панфилов дивизиясының әйгілі 28 гвардияшылар құрамында болғанын ерекшелеп айтуға тиіспіз. Бұдан бөлек, Кемел Тоқаев, Рақымжан Қошқарбаев және қырғыз Сәмибек Егимбердиев №33 мектепте орналасқан жаяу әскер училищесінен майданға аттанады.
Міне, осындай тарихи негіздегі халықаралық іс-шараны Талғар аудандық мәслихатының хатшысы Мұхит Әлібеков ашып, қатысушыларға Даңқ аллеясының ашылуына көмек көрсеткендері үшін алғысын білдірді. Одан кейін жазушы Бақтығали Айжігітов жиналғандарға Отан үшін жанын берген соғыс батырларын мәңгі есте қалдыру бойынша зайыбымен бірге атқарған жұмыстары туралы айтып берді.
Даңқ аллеясының ашылу салтанатында Қырғыз елінен келген қонақтар да сөз алды.
– Құрметті талғарлықтар, біз осындай маңызды іс-шараға – соғыс ардагерлері мен қаза тапқан жауынгерлердің Даңқ аллеясының ашылуына қатысып отырғанымызды жоғары бағалаймыз. Біздің міндетіміз – жастарға фашистерді жеңудің қаншалықты қымбат болғанын жеткізу және ешқашан ұмытпаулары үшін сол оқиғаларды еске түсіру. Бұл аллея тарихи жадты сақтап, өскелең ұрпақты батырлар ерлігіне құрмет пен патриотизм рухында тәрбиелеуге арналған. Оның ұрпақтар сабақтастығын жалғастырып, қазақстандықтар мен қырғыз бауырластардың ерлігін жас ұрпаққа жеткізе беретініне бек сенімдімін, – деді отставкадағы подполковник Жәнібек Барғыбаев.
Бұдан соң қатысушылар Ржевскіден топырақ салынып әкелінген капсуланы қаза тапқан батырларға арналған ескерткіштің астына көмді. Одан соң шара қонақтары көрнекті мемлекет және қоғам қайраткері, Екінші дүниежүзілік соғыс қатысушысы, ақын әрі композитор Алханбек Малкеевті еске алып, ескерткішке гүл шоқтарын қойды.
Даңқ аллеясының ашылу салтанаты соңында К.Тоқаев, Қ. Болтаев, М.Сеңгірбаев, В.Петрищев, С.Егимбердиев, Д.Шопеков, Р.Қошқарбаев, И.Панфилов, Б.Момышұлы, А.Қосаевқа арналған 10 шырша отырғызылды. Оған Жамбыл Жабаев атындағы №6 орта мектептің оқушылары қатысты.
Шара барысында халықтар арасындағы достық пен бірлікті дамыту мен нығайтуға, жастарды патриоттыққа тәрбиелеуге және батырлардың ерлігін мәңгі есте қалдыру бойынша белсенді жұмыс жүргізгені үшін ерлі-зайыпты – Бақытқали Айжігітов пен Сәуле Нағманова «Құрметті ардагер» белгісімен марапатталды.
Даңқ аллеясының ашылуы – тарихи жадты сақтау мен жастарды отаншылдыққа тәрбиелеудегі маңызды қадам. Ол – біздің алғысымыз бен құрметіміздің нышаны. Сол себепті де оның аудан тұрғындары үшін қасиетті орынға айналары сөзсіз.
Құтмағамбет ҚОНЫСБАЙ
Талғар ауданы
