Алматы облысының әкімі Марат Сұлтанғазиев Астана қаласындағы орталық коммуникациялар қызметінің алаңында өткен брифингте өңірдің әлеуметтік-экономикалық дамуы мен биыл атқарылған жұмыс барысы жайлы сөз қозғады.
Аймақ басшысы Қонаев қаласы жаңаша кейіпке еніп, ажары айшықталып, инфрақұрылымын жаңғырту жұмысы қарқын алғанын және Қапшағай су қоймасының негізгі туристік орталықа айналғанын атап өтті.
Облыстың бас шаһарында тұрғындардың өмір сүру сапасын жақсарту мақсатында «Smart Qonaev» тұжырымдамасы қабылданғанын хабардар еткен Марат Елеусізұлы бейнебақылау камералары орнатылып, «iqonaev» электрондық жүйесі енгізілгенін айтты. Сонымен бірге қаланың инфрақұрылымын жаңғырту аясында 39 шақырым жол жөнделіп, жаңадан 50 аялдама орнатылғанын, 73 шақырым электр желісі тартылып, 26 шақырым су құбыры жүргізіліп, 11 трансформатор жаңартылғанын жеткізді.
Облыс әкімінің айтуынша, биыл Қапшағай су қоймасына шамамен 2 миллион турист келген. Бұл өткен жылмен салыстырғанда 36 пайызға артқан. Сонымен қатар «Freedom Holding» қолдауымен №5 қалалық жағажай абаттандырылған. Бұл жағажай «Үздік жағажай» байқауында 30 қатысушының арасынан Бурабайдан кейінгі 2-орынды иеленген. Қапшағай көлі жағалауында құны 11 млрд теңге болатын ASP-Arena көпфункционалды туристік кешен, халықаралық деңгейдегі спорт аренасы, 4 мың орынды трибунасы бар Орталық Азиядағы ең үлкен мұз айдыны іске қосылды. Қапшағай су қоймасы жағалауында жаңа деңгейдегі ірі спорт нысанда ірі турнирлер, халықаралық жарыстар мен спорттық шоулар өткізуге толық мүмкіндік бар. Жуырда облыс теңгеріміне берілген Іле өзені жағасындағы «Көшпенділер» қалашығын алдағы уақытта толық жаңартудан өткізу жоспарлануда.
Мемлекет басшысы Қасым-Жомарт Тоқаевтың Жарлығымен бүгінде қаланың облыс орталығы мәртебесін иеленіп, мемлекет және қоғам қайраткері Дінмұхамед Қонаевтың есімін еншілегеніне 3 жылдан асты. Осы қысқа мерзімде Сейфуллин көшесі төрт жолаққа кеңейіп, 10-шағынауданды қала орталығымен жалғайтын жол салынуда. Көпқабатты үйлер бой көтеріп, тұрғындар баспанамен қамтылуда. Шаһардың ажарын айшықтап тұрған кіреберіс жолдың бойындағы Алматы облысының басты нышаны болған қар барысының мүсіні мақтанышымыз саналады.
Базарбай ОРАЛБАЕВ,
Қонаев қалалық ардагерлер кеңесінің төрағасы
