Талғар ауданы, Панфилов ауылындағы №33 жалпы білім беретін орта мектептің оқушылары үшін есте қаларлық тәрбие сағаты ұйымдастырылды. Мектеп директоры Амина Смағұлованың қолдауымен және алғашқы әскери және технологиялық дайындық пәнінің мұғалімі, запастағы подполковник Батеев Еркін Абакановичтің бастамасымен 50 оқушы 6654 әскери бөліміне танымдық саяхат жасады.
Іс-шара «Ұлттық ұлан – ел айбыны» акциясы аясында өткізіліп, ашық есік күні формасында өтті. Оқушылар әскери бөлімнің күнделікті қызметімен танысып, әскери техника үлгілерін көріп, жауынгерлердің дайындығын жақыннан бақылауға мүмкіндік алды. Сонымен қатар, әскери қызметшілер оқушыларға патриоттық тәрбие, әскери тәртіп, борыш пен жауапкершілік туралы мазмұнды ақпарат берді.
Саяхат барысында мектеп оқушыларына жауынгерлік дайындық алаңы, арнайы құрал-жабдықтар, байланыс жүйелері мен қызметтік кинология бөлімшесінің жұмысы көрсетілді. Жеке құрам өкілдері болашақ ұрпақты Отанды сүюге, тәртіп пен батылдыққа тәрбиелеудің маңызын атап өтті.
Мұндай іс-шаралар жасөспірімдердің патриоттық санасын қалыптастыруға, әскери қызметке деген қызығушылығын арттыруға және Ұлттық ұланның маңызды міндеттерімен таныстыруға зор үлес қосады. Оқушылар саяхаттан ерекше әсер алып, алған білімдері мен көргендері мектеп өмірінде де, болашақ таңдауларында да маңызды рөл атқаратынын атап өтті.
