«Бірыңғай жинақтаушы зейнетақы қоры» АҚ-ның ұйымдастыруымен кезекті онлайн-курс өтті. Оқыту қаржылық сауаттылықты арттыруға, зейнетақы жүйесі мен заңнамасындағы өзгерістер туралы хабардар етуге бағытталды. Оған еліміздің әр облысынан журналистер, блогерлер мен студенттер қатысты.
Курс бағдарламасында әртүрлі тақырып бойынша оқыту модульдері ұсынылды. Қор сарапшылары мен Ұлттық банк өкілдері әлемдегі зейнетақы жүйелерінің үлгілері, БЖЗҚ қызметі, активтерді инвестициялау және жинақтарды сенімгерлік басқаруға беру, зейнетақы төлемдерінің түрлері және оларды алу және салық салу тетіктері туралы баяндады. Жинақтаушы зейнетақы жүйесі туралы қызықты материалды қалай жасауға болатынын көрсетті. Сондай-ақ шараға қатысушылардың сұрақтарына жауап берді.
Аталған семинарда зейнетақы активтерін инвестициялау тақырыбы кеңінен сөз болды. «Бірыңғай жинақтаушы зейнетақы қоры» АҚ инвестициялық портфельді талдау басқармасының бастығы Ләззат Әмірғалиеваның сөзінше, зейнетақы активтерін басқаруды Қазақстан Республикасының Ұлттық банкі жүзеге асырады. Зейнетақы активтерін басқарудың тиімділігін арттыру бойынша ұсыныстарды әзірлеу функцияларын Қазақстан Республикасының Президенті басшылық ететін Ұлттық қорды басқару кеңесі орындайды. 2021 жылдың қаңтарынан бастап қабылданған заңнамалық өзгерістерге сәйкес, жеткіліктілік шегінен асатын зейнетақы жинақтарының бір бөлігін салымшылар өз қалауы бойынша инвестициялық портфельді басқарушыларға өткізе алады. «Зейнетақы активтерін инвестициялық басқару мен есепке алудың барлық жүйесі ашық сипатта жүргізіледі. Әрбір инвестор өзінің инвестициялық табысын enpf.kz сайтындағы жеке кабинетінен немесе мобильді қосымшадан, сонымен қатар eGov.kz порталындағы жеке кабинетінен көре алады. Зейнетақы активтері орналастырылған қаржы құралдарының инвестициялық басқарылуы туралы ақпарат ай сайын БЖЗҚ ресми сайтындағы (www.enpf.kz) «Көрсеткіштер/ Инвестициялық белсенділік» бөлімінде жарияланады. Зейнетақы жинақтары салымшы зейнет жасына жеткенге дейін Ұлттық банктің бақылауында болған кезеңде инфляция деңгейі ескеріле отырып, сақталуына кепілдік беріледі. Ал жинақтарды инвестициялық портфельдің басқаруына беру кезінде зейнетақы активтері бойынша табыстылықтың ең төменгі деңгейін қамтамасыз етуге берілетін мемлекеттік кепілдік басқарушы компанияның кепілдігімен ауыстырылады. Табыстылықтың ең төменгі деңгейі нарықта жұмыс істейтін инвестициялық портфельдің басқаруына берілген зейнетақы активтерінің орташа өлшемі негізінде есептеледі», – деді Ләззат Әмірғалиева.
БАҚ өкілдеріне арналған семинарда жаңа Салық кодексінде БЖЗҚ салымшылары үшін қандай жаңалықтар енгізілгені, салық салу тәртібінің қалай өзгеретіні және азаматтардың нені ескеруі керек екені егжей-тегжейлі түсіндірілді. «Бірыңғай жинақтаушы зейнетақы қоры» АҚ басқарушы директоры Мұрат Шәріповтің айтуынша, 2026 жылдың
1 қаңтарынан бастап жаңа Салық кодексі күшіне енеді. «Мемлекет басшысының тапсырмасына сәйкес, азаматтардың Бірыңғай жинақтаушы зейнетақы қорынан алатын төлемдерге жеке табыс салығы салынбайды. Бұл төлемдер қатарына зейнетақы, мұрагерлерге берілетін қаражат және тұрғын үй жағдайын жақсартуға немесе емделуге бағытталған жинақтар кіреді. Салық тек қана Қазақстан азаматы емес тұлғалардан ғана ұсталады», – деді Мұрат Шәріпов. Қор өкілінің түсіндіруінше, қазіргі таңда зейнетақы қорынан алынатын барлық төлемнен 10 пайыз мөлшерінде жеке табыс салығы ұсталып келеді. Мысалы, тұрғын үй алу немесе емделу мақсатындағы қаражаттан да осы салық алынады. Мұрат Шәріповтің сөзінше, жаңа өзгерістерге сәйкес, Салық кодексінің 346-бабында көрсетілген кейбір санаттағы азаматтарға жеңілдіктер беріледі. Бұл қатарға мүгедектігі бар тұлғалар, мүмкіндігі шектеулі баланы асырап алған ата-аналар, Отан соғысына қатысушыларға теңестірілген адамдар және басқа да әлеуметтік топтар кіреді.
Шара соңында «Бірыңғай жинақтаушы зейнетақы қоры» АҚ басқарушы директоры Мұрат Шәріпов семинар тыңдаушыларына алғысын білдіріп, курс барысында алған ақпараттың БАҚ өкілдері үшін тиімділігі зор болатынына сенім білдірді.
Ерзат Асыл
