Еңбекшіқазақ ауданы Ащысай ауылындағы балалар мен жасөспірімдер спорт мектебінде ушу және пенчак силаттан жасөспірімдер арасында облыстық чемпионат өтті.
«Бұл сайыстың мақсаты – үздік шыққан спортшыларды Қазақстан құрамасына іріктеу. Олар келер жылы ушу мен пенчак силаттан Азия және әлем чемпионатында бақтарын сынайтын болады», – дейді жаттықтырушы Имаржан Идилаев.
Жарыстың ашылу салтанатына Еңбекшіқазақ ауданы әкімінің орынбасары Ерболат Сарабеков және ардагер-спортшылар қатысып, қатысушыларға сәттілік тіледі.
Аталған чемпионатқа облыстың әр аудан-қаласынан барлығы 11 команда қатысып, 430-дай жекпе-жек шебері күш сынасты. Екі күнге созылған сайыс қорытындысы шығып, жеңімпаздар анықталды. Бірінші орынды Талғар қаласының командасы жеңіп алса, екінші орынды Қонаев қаласының жекпе-жек спорт мектебі, ал үшінші орынды Еңбекшіқазақ ауданының спортшылары иеленді. Жеңімпаздар мен жүлдегерлер арнайы медаль және Алғыс хатпен марапатталды.
Анарбек МӨКІШҰЛЫ