Қоғамда өрт сөндірушілердің орны қашанда ерек. Бүгінгі таңда бұл мамандықты өмір мұраты етіп таңдайтындар аз. Жастардың көпшілігі заман талабына сай, жаңа жұмыс түріне ағылады да жатады. Бұл да дұрыс шығар. Бірақ қиын сәтте адам жанын сақтап қалатын, сол жолда ешқандай кедергіге қарамай, өзгелердің өмірін өз амандығынан биік қоятын төтенше жағдай қызметкерлері адамзат үшін ауадай қажет екенін ұмытпаған абзал.
Осы бір қауіпті де қатерлі саланы жанына серік еткендердің бірі – Асқар Ақылбек. Мектепті бітіре салысымен ол Алматыдағы Тұран университетінде төтенше жағдай саласында білім алады. Қазіргі таңда Қонаев қаласындағы өрт сөндіру қызметінде жұмыс істеп жүр.
«Адамдарға көмек көрсетіп, қоғам қауіпсіздігіне үлес қосу үшін осы мамандықты таңдадым. Біз үшін әр секунд шешуші рөл атқарады. Сондықтан жауапкершілік пен батылдық басты қаруың болуы керек. Жастардың бұл мамандыққа келуі өте маңызды. Себебі заманауи техникамен жұмыс істей алатын, күш-жігері мықты, жаңа көзқарастағы мамандар қоғамға қажет.
Қызмет барысында көптеген жағдай болады. Қонаев қаласындағы тұрғын үйдің бірінде шыққан өрт кезінде бірнеше адамды аман алып қалған кез есімде ерекше сақталыпты. Қауіпке қарамастан, командалық жұмыстың дұрыс ұйымдастырылуының арқасында адамдарды қауіпсіз жерге шығарып, өртті дер кезінде сөндіре алдық. Бұл оқиға маған мамандығымның маңызын тағы бір мәрте дәлелдеді.
Өрт сөндірушілердің басты құндылығы – адам өмірінің амандығы. Кез келген төтенше жағдайда тез әрі дұрыс шешім қабылдай білуі керек. Себебі жауапкершілік сезімі бәрінен қымбат. Бұл мамандардың бойында батылдық, шыдамдылық, командамен жұмыс істей алу, физикалық және психологиялық төзімділік болуы қажет.
Жас маман ретінде бұл салада жаңа технологияларды көбірек қолдануды, жабдықтарды жаңартуды және қызметкерлердің кәсіби даярлығын күшейтетін қосымша тренингтер ұйымдастырылуын қалар едім. Сондай-ақ өрт қауіпсіздігі жөнінде халыққа түсіндіру жұмысын көбейтуді дұрыс деп санаймын», – дейді Асқар Шыңғысбайұлы.
«Апат айтып келмейді». Дер кезінде көрсетілген көмек хал үстіндегі адамның шырағын қайта жағып, өмірдің тәтті дәмін сезіндіреді. Сонда талай адамның көз жасы төгілмес еді, бүлдіршін қамқоршысынан, ата-ана перзентінен айырылып, зарлы жоқтау айтпас еді. Сондықтан да төтенше жағдай қызметкерлерінің жанкешті еңбегі құрметке лайық.
Гүлзат АЗАТҚЫЗЫ
Қонаев қаласы
