Қонаев қаласында тұрмыстық зорлық-зомбылық құрбандарына арналған әлеуметтік көмек көрсету орталығы орналасқан. Мекеменің негізі осыдан үш жыл бұрын қаланған еді. Қазір бұл жерді жеті әйел бала-шағасымен паналап отыр.
Соның бірімен «Зорлық-зомбылықсыз 16 күн» акциясы аясында сұқбаттастық.
Г. есімді әйел орталық көмегіне жақында ғана жүгінген. Балаларын Қонаевтағы мектептің біріне орналастырып, өзі құқықтық және психологиялық көмек алуда.
«Күйеуім 10 жылдай уақыт ішімдік ішті. Балаларды ұрып-соғатын, таяғы маған да тиетін. Полицейлерге хабар беріп едім, осы жерге орналастырды. Қазір оңалту курсынан өтіп жатырмын. Бұл жерден шыққан соң, пәтер жалдап, балаларыммен бірге күнімізді көрерміз. Мемлекет жақсы көмектесіп жатыр» – деді әйел.
Оның айтуынша, зорлық-зомбылық көрген кез келген адам оған төзбеуі тиіс. Уақыт өте келе, ұрып-соғуға ет үйреніп, балалар тұйықталады, психологиялық жағдайы бүлінеді.
«Адам өз-өзін құқықтық жағынан қорғауы қажет екенін түсіндім. Әсілі, мұндай орталықтар қажет. Күнде түрлі жаңалықтарды көріп жатырмыз. Көмекке, қолдау мен қорғауға мұқтаж әйелдер өте көп. Қайғылы жағдаймен аяқталып жатқан сәттерді де естіп жүрміз. Күйеуіммен ажырастым, енді өмірім түбегейлі өзгеретініне сенемін» – деді ол.
Аталған орталықта аналарға жұмысқа орналасуға да көмек береді. Мамандар басқа өңірдегі әріптестерімен тәжірибе алмасып, үнемі біліктілік деңгейін арттырып отырады.
Қонаевта «Жанұя» отбасын қолдау орталығы да қызмет етеді. Әлеуметтік көмек көрсету орталығына орналасу үшін алдымен әйелдер осы мекемеге жүгінеді. Жыл басынан бері отбасын қолдау орталығы 200-ден астам адамға қол ұшын созған. Ал 111 сенім телефонына Алматы облысы бойынша 50-ге жуық қоңырау түскен. Сондай-ақ отбасында жәбір көрген азаматшалар полиция қызметінің 102 байланыс нөміріне де хабарласады.
Қонаев қаласының әкімдігі тұрмыстық зорлық-зомбылыққа нөлдік төзімділік қажет екенін еске салады.
