Облыс әкімі Марат Сұлтанғазиев актер, мәдениет қайраткері Асанәлі Әшімовтің қайтыс болуына байланысты көңіл айтты.
“Бүгін тұтас қазақ өнері орны толмас ауыр қазаға ұшырады.
Ұлт мәдениетінің тау тұлғасы, ҚР Еңбек ері, қазақ киносының аңызы, театр педагогі, сахна мен экран өнерінде өшпес із қалдырған аңыз адам Асанәлі Әшімов ағамыздың дүниеден өткені жайлы суық хабар барша халықты бейжай қалдырмады.
Асанәлі ағамыздың шығармашылық жолы – қазақ өнерінің тұтас бір шежіресі. «Қыз Жібек» фильміндегі Бекежан бейнесі арқылы ұлттық кино тарихында мәңгілік кейіпкер бейнесін қалыптастырды. Сондай-ақ «Атаманның ақыры», «Транссібір экспресі», «Қараш-Қараш оқиғасы», «Аңыздың ақыры», «Көшпенділер» сынды туындылардағы сомдаған тұлғаларымен бірге қазақ киносының алтын қорына енді.
Асанәлі Әшімов тек актер емес – бүтін бір мәдени дәуірдің тарихы, ұстаз, ұлттық өнердің биік шоқтығын қалыптастырған, кейінгі буынға жол көрсеткен темірқазық.
Аңыз ағамыздың қалдырған өлшеусіз мұрасы – ұрпаққа үлгі, есімі – қазақ мәдениетінің қазынасы.
Осынау қайғылы сәтте марқұмның отбасы мен жақындарына, өнердегі әріптестеріне және барша қазақ еліне көңіл айтамын.
Қазақ театр-кино өнерінің абызына айналған Асанәлі Әшімов бейнесі халқының жадында мәңгі сақталады” деп жазды өңір басшысы Instagram парақшасында.
