Қонаев қалалық Мәдениет үйінде «Қазақ вальсінің королі» атанған Шәмші Қалдаяқовтың 95 жылдығына орай Сүйінбай атындағы облыстық филармония «Бақыт құшағында» атты концерт өткізді. Онда ұлы композитордың халық жүрегінен орын алған әндері шырқалып, көрермен ескі күннің таспасын көз алдына елестетіп, ерекше әсерге бөленді.
– Концертте 40 жылдық тарихы бар «Адырна» фольклорлы- этнографиялық және «Алтынай» мемлекеттік би ансамбльдері, ҚР Еңбек сіңірген қайраткері Құдайберген Бекіш, Мәдениет саласының үздіктері Өмірқұл Айниязов, Бибігүл Қилымхан, филармонияның дәстүрлі әнші-күйшілері өнер көрсетті. Өңір тұрғындары музыканың құдіретінен нәр алсын деген мақсатта осы шараны ұйымдастырдық, – деді Сүйінбай атындағы облыстық филармонияның директоры Нұрлан Сағынай.
– Шәмшінің әндері ғасырларға жалғасып, ұрпақтан-ұрпаққа ауысқан асыл мұра болып қалары сөзсіз. Айтулы тұлғаның әрбір туындысында қазақтың рухы асқақтап тұрады. Бұл мерекелік кеште «Адырна» оркестрінің сүйемелдеуімен «Әнім сен едің», «Қайдасың?» атты әндерді шырқадық. Шәмшіге деген құрмет – халыққа көрсетілген құрмет, – деді Қазақстанның еңбек сіңірген қайраткері Құдайберген Бекіш.
Жиналған қауым композитордың мәңгілік әуенін бірге шырқап, рухани ләззатқа бөленді. Композитордың өмір жолынан хабар беретін, жандүниесінен сыр шертетін қойылымды тамашалап, ішкі әлеміне бойлады. «Менің әнім шырқалғанда мені тыңдамаңыздар. Өз жүректеріңізге үңіліңіздер. Онда мен жоқпын, тек қазақтың үні бар» деген Шәмші Қалдаяқовтың сөзі оның бар ғұмырының құпиясы іспетті көрінді.
Гүлзат БАЙҚОНЫСОВА
Қонаев қаласы
