Қоғамдық қауіпсіздік пен ел тыныштығын күзетуде Қазақстан Республикасы Ұлттық ұланының рөлі зор. Осы жауапты міндетті абыроймен атқару үшін Ұлттық ұланның 6654 әскери бөліміне егіз сарбаздар – Иллесов Берік Манатұлы және Иллесов Ерік Манатұлы өз еріктерімен келіп, мерзімді әскери қызметін бастап отыр. Олар алдағы бір жыл бойы аталған әскери бөлімде қызмет өткереді.
Берік пен Ерік 2007 жылғы 10 наурызда Қарағанды қаласында өмірге келген. Егіздер түнгі уақытта, сағат 23:55 пен 00:00-де дүние есігін ашқан. Үш балалы отбасында тәрбиеленген сарбаздардың бір інісі бар. Ата-аналары оларды кішкентайынан тәртіпке, еңбекқорлыққа және елге қызмет етуге баулып өсірген.
Егіз бауырлар орта мектепті үздік аяқтап, кейін колледжде білім алған. Берік ақпараттық технологиялар (IT) мамандығын таңдаса, Ерік менеджмент бағыты бойынша оқыған. Жастардың білімге деген ынтасы мен өмірге белсенді көзқарасы олардың азаматтық ұстанымынан да байқалады.
Берік пен Ерік бос уақыттарын мазмұнды өткізгенді ұнатады, бірге саяхаттауға әуес. 15 жасында алғаш рет шетелге шығып, Дубай қаласында болған. Кейін Түркия, Мысыр, Вьетнам және Грузия елдерін аралаған. Сарбаздардың айтуынша, ерекше әсер қалдырған ел – Вьетнам, оның табиғаты мен ұлттық тағамдары көңілдерінен шыққан.
Егіз сарбаздардың жеке өмірінде де ұқсастық көп. Қыз достары да егіздер – Ақерке мен Жанерке, олар сарбаздарды қолдап, әскери қызметін абыроймен аяқтап оралуын күтіп отыр.
Берік пен Ерік әскери қызметке әскери комиссариатқа өз еріктерімен келген. Олар Отан алдындағы азаматтық борышты өтеуді әрбір ер азаматтың қасиетті міндеті деп санайды. Қазіргі уақытта егіз сарбаздар 6654 әскери бөлімінің оқу пунктінде алғашқы әскери дайындықтан өтіп, әскери жарғы талаптарын меңгеруде.
Елге адал қызмет етуді мақсат еткен егіз сарбаздардың бұл қадамы – жас буынға үлгі, патриоттық рухтың айқын көрінісі.
Қырғызбай Альбина Қайратқызы,
6654 әскери бөлімінің Бөлініс бастығы (кітапхана бастығы), кіші сержант
